Duajeni Qeverinë …, si sytë e ballit!

Zgjidhni problemet e juaja të vogla pa e munduar shumë kokën, trurin dhe shpirtin, sepse natyra ashtu kështu do t’i zgjidhë problemet e juaja të mëdha.

Si për shembull përmes pandemisë, aksidentit në trafik, rënies prej katit të dhjetë pa parashut, tërmetit, vullkanit, cunamit, gazrave helmues e kështu me radhë.

Edhe Qeveria mund t’i zgjidhë problemet e juaja të mëdha nëse ju vetë i zgjidhni problemet e juaja të vogla.

Për shembull duke ju lavdëruar që jeni të mençur si Ajnshtajni, të vëmendshëm si Pal Lekë Hajni, të bukur si Kimete Berisha dhe të zellshëm, të talentuar, të shpejtë dhe të drejtë si ljubimci i Edi Rames Mihajlloviq Sinisha.

Sepse nëse ju ia zgjidhni Qeverisë gratis problemet e vogla, atëherë Ministrave që paguhen për t’i zgjidhur problemet e juaja të mëdha, do t’ua theni në rrënjë mullarin, sepse ata tërë ditën do të kenë kohë për të diskutuar për sasinë e sheqerit në kokrrat e rrushit të Rahavecit, me Tuta Bombarder Bugarin.

Prandaj do t’ju duan si sytë e ballit, si diellin që bën dritë, si lulet e beharit, si nënat që ju kanë rritë.

Do t’ju duan si këngët tallava, si të dashurën abetare, shkronjat e së cilës ende nuk i kanë mësuar si duhet, ani pse janë shkolluar pa pare.

Prandaj aman duajeni edhe ju qeverinë si sytë e ballit, sepse e keni dritë të bebzave dhe zëvendësim të thjerrzave.

Dhe mundësisht nëse e vëreni se po udhëtoni në amshim prej Pandemisë, merreni ndonjë Ministër sakat dhe qorr, me veti n’vorr.

Sepse edhe atje do t’u bëjnë dritë, dhe do t’ju shpëtojnë nga Xhelati i territ, pesë sekonda para se t’ua vëjë në fyt litarin e ferrit.

Në fakt ju jeni te lumtur që po ju duket se Qeveria s’po ju shkakton probleme të vogla edhe pse paguhet prej jush për t’i zgjidhur problemet e juaja të mëdha.

Sepse Qeveritë pararendëse ua kanë asish sve po spisku ndërsa kjo e tanishmja s’po ka kohë m’u marrë me hallet e juaja.

Sepse vetëm për ta lexuar spisakun e gjatë të seksit të qeverive të kaluara me trurin dhe trupin e juaj, asaj i duhen më së paku dy vite.

E ju deri atëherë ëmbëlsohuni dhe freskohuni me kifle, tullumba, akullore dhe simite.