Zeqir Bekolli, Drenas
Zgjedhjet për kryetarin e komunës së Drenasit po mbahen në një atmosferë ku mediat po luajnë një rol të dukshëm në përcjelljen e garës ndërmjet kandidatëve. Megjithatë, ajo që bie menjëherë në sy është mungesa e fokusit në aspektin më thelbësor të këtyre garave te programet konkrete qeverisëse dhe vizionet zhvillimore të kandidatëve.
Në vend që të nxjerrin në pah ide të qarta dhe strategji të mirëpërcaktuara për zhvillimin e Drenasit, shumë nga mediat kanë shpërqendruar vëmendjen drejt elementeve që kanë më shumë ngjyrim politik, emocional apo personal, duke u fokusuar në akuza të ndërsjella, retorikë populiste apo thjesht prezantime të përgjithshme pa thellim.
Kjo qasje përçon një mesazh të gabuar te qytetarët, që mbeten të paqartë për atë çfarë realisht ofrojnë kandidatët për komunën e tyre.
Një proces zgjedhor që i shmanget analizës së programeve dhe zgjidhjeve konkrete nuk është vetëm një dështim mediatik e politik, por edhe një pengesë për funksionimin e demokracisë lokale.
Në mungesë të një debati të thelluar mbi politikat zhvillimore, qytetarët janë të privuar nga mundësia për të bërë një zgjedhje të informuar, duke u mbështetur në premtime të përgjithshme dhe retorikë pa substancë.
Në këtë kontekst, përgjegjësia bie edhe mbi kandidatët, të cilët duhet të shfrytëzojnë platformën mediatike për të komunikuar me publikun vizionin e tyre konkret, planet zhvillimore, dhe mënyrën sesi do t’i adresojnë sfidat e komunës. Pa këtë, garat zgjedhore rrezikojnë të reduktohen në një lojë imazhi, ku suksesin e merr ai që bën më shumë bujë, jo ai që ka programe të mirëfillta dhe të realizueshme.
Mediat duhet të ushtrojnë një rol mbikëqyrës dhe edukues, duke vendosur theksin aty ku duhet: tek përmbajtja e programeve dhe angazhimi i kandidatëve për zbatimin e tyre. Vetëm në këtë mënyrë do të mund të rritet cilësia e debatit publik dhe do të forcohet besimi i qytetarëve në procesin demokratik.
Gara për kryetarin e Drenasit nuk mund të përmbyset në një spektakël ku mungon përmbajtja, por duhet të bëhet një përpjekje e sinqertë dhe e fokusuar për të sjellë në dritë programe të qarta, ide dhe plane që do ta çojnë komunën drejt një të ardhmeje më të mirë. Ky është kushti themelor për një demokraci funksionale dhe zhvillim të qëndrueshëm lokal.
