Nga: Nexhmije Mehmetaj
Hyrje
Mërgimi shqiptar në Zvicër ka prodhuar dinamika të reja sociale, kulturore dhe arsimore, të cilat janë zhvilluar në mënyrë të diferencuar ndër breza. Në këtë kuadër, integrimi i gruas shqiptare përfaqëson një dimension të rëndësishëm të studimeve mbi diasporën dhe integrimin shoqëror. Veçanërisht brezi i dytë i femrave shqiptare, i lindur dhe i arsimuar në Zvicër, paraqet një rast studimi domethënës për të analizuar ndërthurjen midis ruajtjes së identitetit kulturor dhe pjesëmarrjes aktive në shoqërinë pritëse.
Ky punim mbështetet në përvoja empirike të mësimdhënies së gjuhës shqipe në diasporë dhe në ndjekjen afatgjatë të rrugëtimit arsimor dhe profesional të ish-nxënëseve shqiptare. Qëllimi është të evidentohet se si investimi në arsim, dygjuhësi dhe përfshirje prindërore ka kontribuar në integrimin e suksesshëm të brezit të dytë të grave shqiptare, të cilat sot janë të përfaqësuara në fusha të ndryshme profesionale dhe institucionale në Zvicër.
Integrimi i gruas shqiptare në Zvicër merr kuptimin më të plotë kur shihet përmes brezit të dytë: vajzave shqiptare të lindura dhe të arsimuara në këtë vend, të cilat sot janë të pranishme dhe të suksesshme në fusha kyçe të shoqërisë zvicerane. Përvoja konkrete nga mësimdhënia me fëmijë shqiptarë në diasporë e bën këtë proces jo vetëm të dukshëm, por edhe thellësisht domethënës.
Në klasat e mësimit plotësues të gjuhës shqipe, ndër vite janë formuar breza vajzash që kanë nisur rrugëtimin e tyre arsimor me sfida të dyfishta: dygjuhësinë, dy kulturën dhe shpesh pritshmërinë tradicionale të familjes. Megjithatë, pikërisht këto vajza kanë dëshmuar një kapacitet të jashtëzakonshëm për përshtatje, përkushtim dhe ambicie akademike.
Nga përvoja në shkollën shqipe të mësimit plotësues, shumë prej tyre spikatin që herët për seriozitetin, ndjenjën e përgjegjësisë dhe dëshirën për të ecur përpara. Vajza që dikur mësonin shkrim-leximin në gjuhën shqipe, që recitonin poezi për festat kombëtare apo diskutonin mbi identitetin kulturor, sot janë gra të reja me arsimim universitar të lartë, shumica me nivel master, të integruara plotësisht në jetën profesionale dhe shoqërore të Zvicrës.
Emra ish-nxënëse të mia si Jehona Ostautaj, Shake Jasiqi, Mirlinda Kadriu, Donika Morina, Kosovare Morina, Dea Ajeti, Donjeta Loshi, Liridona Hulaj, Egzona Hamzaj, Egzona Sejdiu, Kosovare Berisha, Saranda Ferati, Diana Ferati, Gresa Ferati, e shumë të tjera, përfaqësojnë sot një brez femrash
shqiptare të arsimuara, të vetëdijshme për rolin e tyre dhe të afta për të kontribuar në fusha të ndryshme profesionale.
Në mësimin shqip, ato janë rritur me bindjen se njohja e gjuhës dhe kulturës shqiptare nuk përjashton integrimin, por e pasuron atë. Kjo është reflektuar më vonë në zgjedhjet e tyre akademike dhe profesionale. Shumë prej tyre janë orientuar drejt arsimit, shëndetësisë, shkencave sociale, drejtësisë apo biznesit, duke u bërë shembuj konkretë të integrimit të suksesshëm.
Një rast veçanërisht domethënës është ai i Vanesa Mehmetaj, e cila, nga një nxënëse e rregullt në mësimin e gjuhës shqipe, ka arritur në një pozitë të lartë institucionale si prokurore në Kantonin Jura. Ky rrugëtim përfaqëson kulmin e integrimit qytetar dhe profesional, por edhe besimin e shoqërisë zvicerane ndaj brezit të dytë të emigracionit shqiptar.
Përvoja nga klasa tregon qartë se suksesi i këtyre vajzave nuk është i rastësishëm. Ai është rezultat i një trekëndëshi të fuqishëm: familja – shkolla zvicerane – mësimi plotësues i gjuhës shqipe. Në këtë proces, nënat shqiptare kanë luajtur një rol kyç, duke e mbështetur arsimin e vajzave të tyre dhe duke i inkurajuar ato të synojnë lart, pa humbur lidhjen me rrënjët kulturore.
Brezi i dytë i femrave shqiptare në Zvicër është sot dëshmi e gjallë se integrimi i vërtetë nuk është asimilim, por rritje në dy kultura, me vetëbesim dhe përgjegjësi shoqërore. Ish-nxënëset e dikurshme janë sot profesioniste, qytetare aktive dhe modele pozitive për brezat që vijnë.
Në përfundim, integrimi i gruas shqiptare në Zvicër shihet më qartë se kurrë në historitë reale të vajzave që kanë kaluar nga bankat e klasës në universitete dhe institucione shtetërore. Këto përvoja konkrete dëshmojnë se investimi në arsim, në gjuhën amtare dhe në vlera është çelësi i një integrimi të qëndrueshëm dhe të denjëtetëshëm.
Përfundim
Përvoja ime në shkollën e mësimit plotësues dhe nga ndjekja e rrugëtimit arsimor të ish-nxënëseve shqiptare dëshmon qartë se integrimi i gruas shqiptare në Zvicër është një proces i suksesshëm dhe i qëndrueshëm, kur ai ndërtohet mbi themelin e arsimit, mbështetjes familjare dhe ruajtjes së identitetit kulturor. Brezi i dytë i femrave shqiptare sot përfaqëson një realitet të ri: gra të arsimuara, të pavarura dhe të integruara plotësisht në jetën profesionale dhe institucionale të vendit pritës.
Nga mësuesia në institucionin parashkollorë e fillore, në mjekësi, drejtësi, biznes e fusha të tjera, këto gra janë dëshmi e gjallë se dygjuhësia dhe dykulturësia nuk
janë pengesë, por pasuri. Ato janë rezultat i një pune të heshtur, por të vazhdueshme, të nënave, mësuesve dhe komunitetit shqiptar në diasporë.
Në përfundim, integrimi i gruas shqiptare në Zvicër nuk duhet parë më si një sfidë e papërfunduar, por si një histori suksesi ndërbrezor. Ish-nxënëset e dikurshme, sot profesioniste dhe qytetare aktive, janë prova më bindëse se investimi në arsim, në gjuhën amtare dhe në vlera është rruga më e sigurt drejt një integrimi dinjitoz dhe të barabartë.
Gjenevë, 28.01. 2026
Me pelqeu shume dhe e pergezoj Zojen Nexhmije Mehmetaj per kete shkrim te mrekullueshem rreth rrezultateve te sukseseshme te brezit te dyte te vajzave shqiptare ne emigracion ne Zvicer.
Po ashtu e pergezoj Zojen Nexhmije Mehmetaj edhe per kontributin e madh te saj patriotik dhe intelektual me metodat pedagogjike, qe i transmeton brezave te rij emigrant shqiptar. Vete prania e saj ne shkollat e ndihmes se gjuhes shqipe ne Gjeneve asht nji ngrohtesi amtare per te rijt emigrant, te cilet prezenca e saj i ban te ndjehen si ne vendin e vet.
Keto rrezultate te rijve shqiptar sidomos nga Kosova jam tuj i konstatu edhe un kndej nga ana gjermanisht folse e Zvicres. Por jo vetem kaq, un konstatoj me shume knaqesi se si brezi i dyte i te rijve pa dallim seksi jane te inseruem mire ne jeten e ketij vendi te mrekullueshem, ku cdokushi mund te ecin perpara pamvartesisht nga vendi i origjines, krejt ndryshe mjerisht nga trojet tona ku rinia e sotme nuk ka kurrefar perspektive per te ardhmen.
Z.Paul ju falënderoj sinqerisht për fjalët e çmuara, vlerësimin e ndjerë dhe reflektimin tuaj kaq domethënës. Mendimet tuaja jo vetëm që më nderojnë, por edhe e pasurojnë më tej diskutimin rreth rolit dhe arritjeve të brezit të dytë të vajzave dhe të rinjve shqiptarë në emigracion.
Është kënaqësi e veçantë të dëgjosh se të njëjtat rezultate pozitive po konstatohen edhe në pjesën gjermanishtfolëse të Zvicrës, çka dëshmon se puna, përkushtimi dhe integrimi i brezit të ri shqiptar po japin fryte të dukshme në mbarë vendin.
Shkollat e gjuhës shqipe dhe përfshirja e mësuesve në to mbeten një urë e fortë lidhjeje me gjuhën, kulturën dhe identitetin tonë, duke u dhënë të rinjve jo vetëm dije, por edhe ndjenjën e përkatësisë dhe sigurisë shpirtërore.
Ju faleminderit për këtë kontribut të vlefshëm në debatin tonë të përbashkët dhe për ndarjen e përvojës suaj të çmuar.