Shqiptar Shaljani, Shalë e Bajgorës, Mitrovicë’
(Ahmet Musa)
Koordinatat për Kompleksin Kishtar në Bajgorë – një hap i madh drejt ringjalljes shpirtërore dhe identitare
Të dashura mike e miq, të dashur shaljanë dhe shqiptarë kudo që jeni,
Me zemër të mbushur me gëzim e mirënjohje, dëshiroj të ndaj me ju një lajm të rëndësishëm e tejet domethënës për gjithë Shalën e Bajgorës dhe më gjerë për kombin tonë: sot, bashkë me disa miq e bashkëveprimtarë si dhe me përfaqësuesin e Kishës Katolike për Mitrovicë e Vushtrri kemi lokalizuar vendin dhe kemi vendosur koordinatat për ngritjen e Kompleksit Kishtar në Bajgorë, në zemër të Shalës së Venit.
Vendndodhja e zgjedhur është një thesar natyror dhe shpirtëror – një pikë strategjike ku horizonti i Dardanisë hapet si pëllëmba e dorës. Prej aty, shikimi prek male e fusha, ndërsa zemra ndjen jehonën e historisë së lashtë të kësaj treve fisnike. Vend i bekuar me natyrë, me burime, me gjak dëshmorësh dhe me rrënjë të thella shpirtërore.
Ky kompleks nuk do të jetë thjesht një ndërtesë, por një simbol.
Një simbol i rikthimit në identitetin tonë të lashtë shqiptar.
Një monument për besimin dhe lirinë shpirtërore.
Një vatër e bashkimit dhe krenarisë kombëtare.
Një thirrje ndaj ndërgjegjes sonë historike dhe kulturore.
Kompleksi do të ketë vlera të shumëfishta:
Shpirtërore, si një vend lutjeje dhe reflektimi për të gjithë shqiptarët që ndihen të lidhur me besimin e të parëve;
Historike, si një gur kujtese për identitetin tonë të lashtë që nuk u shua, por po rilind;
Kulturore, si një pikë referimi për trashëgiminë dhe vetëdijen kombëtare;
Turistike, pasi vendi ku do të ndërtohet është mahnitës dhe do të tërheqë vizitorë nga të gjitha trojet dhe më gjerë.
Ju ftoj me dashamirësi dhe sinqeritet që, pasi të shihni fotot e bashkangjitura, të ndani me ne mendimet dhe ndjesitë tuaja:
A ju duket vendi i përshtatshëm?
Si ju duket pamja dhe përfytyrimi i këtij kompleksi?
Çfarë do të dëshironit të përfshinte ai për të qenë sa më përfaqësues për Shalën dhe për kombin shqiptar?
Ky është një projekt që na përket të gjithëve. Zëri juaj ka rëndësi, e mbështetja juaj është forcë.
Zoti i bekoftë të gjithë ata që po e mbështesin këtë iniciativë – më së pari shqiptarët e ndershëm e atdhetarë, dhe më pas edhe miqtë tanë ndërkombëtarë që e njohin dhe e çmojnë rrugën tonë drejt lirisë së plotë shpirtërore dhe kombëtare.
Rruga drejt ndriçimit vazhdon. Bajgora po bëhet dritë.
Shënim: “Pres me interes mendimin tuaj të sinqertë në komente – çka ju frymëzon më shumë nga ky vizion?”
I nderuemi Shqiptar Shaljani, alias Ahmet Musa!
Lexova me kujdes shkrimin e juaj dhe mendoj se keni bërë mirë.
Sipas doktrinës katolike, Zoti e ndihmon secilin dhe bëhet aleat ndihmëtar dhe shpërblyes i njeriut (por në botën tjetër), në të cilën në të vërtetë fillon jeta e mirëfillët.
Sa i përket pasurisë DHE PASANIKËVE qendron një urti:
“Më leht deveja do të kalojë nëpër vrimë të gjilperës, se sa QË PASANIKU DO TË HYJË NË MBRETËRINË E ZOTIT”.