Selatin Retkoceri, Llugaxhi, Lipjan
A po e pengon Qeveria Kurti një projekt madhështor për Kosovën, vetëm pse nuk e kontrollon politikisht suksesin e tij? Kosova e ka fituar të drejtën për organizimin e Lojërave Mesdhetare të vitit 2030. Ky ishte një lajm madhështor për vendin tonë, një mundësi historike për afirmimin ndërkombëtar të Kosovës dhe një projekt me përfitime të jashtëzakonshme ekonomike, sportive e turistike.
Por, pavarësisht entuziazmit fillestar, sot po shfaqen shqetësime serioze për ngecjet në përgatitjen e infrastrukturës dhe për aftësinë e institucioneve tona për ta përmbushur këtë përgjegjësi. Duhet ta themi qartë: organizimi i këtyre lojërave ishte një sukses i lidhur me ofertën e Prishtinës dhe angazhimin e kryetarit të saj, Përparim Rama.
Qeveria Kurti duhej ta shihte këtë sukses si një mundësi për të gjithë Kosovën, jo si sukses të një komune apo të një kryetari që i përket një subjekti tjetër politik. Fatkeqësisht, krijohet përshtypja se rivaliteti politik mund të jetë shndërruar në pengesë për një projekt me interes të përgjithshëm shtetëror. Në vend të bashkëpunimit institucional, përgjegjësisë dhe mobilizimit të të gjitha kapaciteteve, po përballemi me rrezikun e humbjes së kohës dhe të një mundësie që nuk na jepet çdo ditë.
Çfarë do të fitonte Kosova nga Lojërat Mesdhetare?
Përfitimet do të ishin shumëdimensionale: Ndërtimin dhe modernizimin e infrastrukturës sportive. Promovimin e Kosovës në arenën ndërkombëtare. Zhvillimin e hotelerisë, turizmit, gastronomisë dhe bizneseve private. Krijimin e vendeve të reja të punës dhe rritjen e aktivitetit ekonomik. Sjelljen e mijëra sportistëve, delegacioneve dhe vizitorëve nga vendet pjesëmarrëse. Një organizim i tillë do të mund të sillte investime dhe qarkullim të konsiderueshëm ekonomik, duke krijuar përfitime që do të ndiheshin edhe shumë vite pas përfundimit të garave. Para më shumë se një viti kam shprehur dyshimin tim se kjo qeveri nuk do të kishte kapacitetin e nevojshëm financiar, organizativ dhe institucional për ta realizuar një projekt të kësaj madhësie.
Sot, shqetësimi im është edhe më i madh. Por, skenari më i keq nuk do të ishte vetëm dështimi i organizimit. Do të ishte humbja e së drejtës për ta organizuar këtë ngjarje dhe kalimi i përgjegjësisë te një shtet tjetër. Nëse kjo do të ndodhte, Kosova do të humbiste jo vetëm një ngjarje sportive, por edhe një mundësi të rrallë për zhvillim ekonomik, afirmim ndërkombëtar dhe investime afatgjata. Nëse ekziston rreziku që një shtet tjetër të marrë përsipër organizimin, institucionet duhet të dalin menjëherë me sqarime publike: kush mban përgjegjësi për vonesat, cilat investime janë realizuar, cilat kanë mbetur pezull dhe çfarë masash konkrete po ndërmerren për ta shpëtuar projektin. Nuk dua të besoj se Kosova do të detyrohet t’ia dorëzojë një shteti tjetër një përgjegjësi që duhej të ishte krenaria jonë. As nuk është e arsyeshme të fajësohet paraprakisht ndonjë shtet për një skenar që ende duhet të vërtetohet. Por është e domosdoshme që qytetarët të informohen për gjendjen reale.
Zoti Kurti, Lojërat Mesdhetare nuk janë pronë e VV-së, e PDK-së, e LDK-së apo e ndonjë kryetari komune. Ato janë pasuri dhe mundësi e Kosovës! Nëse qeveria nuk ka kapacitetet e nevojshme, le të kërkojë bashkëpunim. Nëse ka vonesa, le t’i pranojë dhe t’i korrigjojë. Nëse mungojnë mjetet financiare, le të mobilizojë institucionet dhe partnerët. Por, në asnjë rrethanë, interesi shtetëror nuk duhet të sakrifikohet për rivalitete partiake. Kosova nuk ka luksin të humbasë mundësi të tilla. Kemi nevojë për udhëheqës që dinë t’i bashkojnë kapacitetet e vendit, jo për institucione që lejojnë që projektet madhore të shndërrohen në viktima të politikës ditore.
Dështimi i Lojërave Mesdhetare 2030, nëse ndodh për shkak të neglizhencës apo pengesave politike, do të ishte një dështim i rëndë shtetëror. Për këtë duhet të ketë përgjegjësi politike dhe institucionale.
Kosova meriton më shumë se kaq!
