Pankartat në Zveçan e Leposaviç, instrument i strukturave paralele serbe !

Shfaqja e pankartave në kalanë e Zveçanit dhe në kodrën e Kamiljës në Leposaviç nuk është një veprim i rastësishëm qytetar, por një operacion i orkestruar nga strukturat paralele kriminale të Serbisë në veri të Kosovës. Përmes këtij inskenimi, Beogradi po dërgon mesazhe të koduara dhe të hapura njëkohësisht, duke ndikuar në opinionin publik dhe duke konsoliduar ndikimin politik mbi komunitetin serb në Kosovë.

Ky akt dëshmon disa elemente thelbësore:

Serbia si “politim i brendshëm” i komunitetit serb në Kosovë – Përmes strukturave të veta paralele, ajo vazhdon të jetë aktori dominues në jetën shoqërore, politike dhe psikologjike të serbëve lokalë. Ky ndikim nuk është vetëm simbolik, por përfaqëson një përpjekje të vazhdueshme për ta mbajtur komunitetin të lidhur ngushtë me Beogradin dhe të distancuar nga institucionet e Kosovës.

Mesazhi politik për mbështetje të Listës Serbe dhe Beogradit zyrtar – Pankartat me mbishkrimin “Serbët kundër bllokadës” nuk janë thjesht shprehje pakënaqësie, por narrativë e ndërtuar për të orientuar opinionin e serbëve të Kosovës drejt mbështetjes së Listës Serbe si e vetmja “zë autentik” dhe për të treguar se vendimmarrja politike e komunitetit duhet të vijë nga Beogradi.

Operacion psikologjik i shërbimeve sekrete serbe (BIA dhe VBA)– Ky është një akt tipik i operacioneve psikologjike, ku përdoret simbolika (kalaja, kryqi, flamuri serb) për të gjeneruar një ndjenjë mobilizimi dhe rezistence kolektive. Qëllimi është të dërgohet mesazhi se Serbia jo vetëm që nuk është e dobësuar, por është e pranishme dhe aktive përmes “paralelizmit institucional” dhe instrumenteve të saj të inteligjencës.

Si përfundim ky veprim është pjesë e strategjisë hibride të Serbisë për të ruajtur ndikimin politik, shoqëror dhe psikologjik në veri të Kosovës, duke shfrytëzuar operacionet propagandistike, strukturat paralele dhe narrativën e rrezikut nga “dobësimi i Serbisë”.

Në thelb, kemi të bëjmë me një akt të koordinuar të BIA dhe VBA për të prodhuar efekte të kontrolluara mbi opinionin publik dhe për të justifikuar qëndrimin e vazhdueshëm kundër integrimit të plotë të veriut me institucionet e Kosovës ndaj të cilës veprojnë edhe aparatura gazetareske e Beogradit në Kosovë.