Drizan Shala, ekspert i sigurisë, Prishtinë
____
Reduktimet e papritura të energjisë elektrike dhe kaosi i krijuar sot në Kosovë nuk janë më çështje teknike apo operative. Ato përbëjnë cenim serioz të sigurisë kombëtare dhe duhet të trajtohen si të tilla.
Deklarimi i KOSTT-së se situata është “e papranueshme”, për shkak të devijimeve të mëdha mes energjisë së nominuar dhe konsumit real, tregon qartë se sistemi energjetik – një infrastrukturë kritike shtetërore – është vënë në rrezik. Disbalancat e theksuara në rrjet nuk janë thjesht dështim menaxherial, por sinjal alarmi për veprime të mundshme të qëllimshme, neglizhencë të rëndë ose sabotazh.
Energjia elektrike është shtyllë e funksionimit të shtetit si institucionet e sigurisë, shëndetësia, komunikimet, ekonomia dhe rendi publik).
Çdo destabilizim i saj prodhon efekte zinxhir dhe krijon terren për krizë të kontrolluar ose destabilizim të brendshëm, veçanërisht në një mjedis rajonal të ndjeshëm nga kërcënimet hibride.
Për këto arsye, Prokuroria Speciale e Kosovës duhet të veprojë pa vonesë, duke hapur hetim për:
• Cenim të infrastrukturës kritike,
• Përgjegjësi penale për keq-menaxhim ose veprime të qëllimshme,
• Dhe çdo element që mund të përbëjë sabotazh ndaj sistemit energjetik.
Transparenca, llogaridhënia dhe përgjegjësia ligjore janë thelbësore për rikthimin e besimit publik dhe mbrojtjen e sigurisë kombëtare. Çdo neglizhencë në trajtimin e kësaj situate do të thotë tolerim i rrezikut ndaj shtetit.
