Në  Drenas u mbyll zyra, në sportelet e pensioneve në Prishtinë nuk na i pranojnë as ankesat tona!

Zeqir Bekolli, Drenas

Një zyreje të pensioneve në Drenas ia kanë vënë dryrin. Në derën e saj gjendet njoftimi për mbyllje, por jo edhe arsyetimi përse është mbyllur kjo zyrë, pos sugjerimit se shërbimet mund të kryhen në Prishtinë. Dhe kur i drejtohesh Prishtinës mbetesh më i zhgënjyer se nga  mbyllja e zyrës në Drenas.

Kjo dëshmon se, të jeshë pensionist, në këtë kohë në Kosovë, do të thotë të jesh kategoria më e nënçmuar dhe më e fyer. Pos që je qytetar i rendit të dytë, krijohet përshtypja se në sytë e “zyrtarëve” je edhe një shtresë me të cilën mund të sillen si të duan vet, pa e ditur se ata janë vetëm shërbëtorë të qytetarëve,  që paguhen nga taksapaguesit. Prandaj, mos u habitni kur për një përgjigje, pensionisti mund të pres edhe me dy e tre muaj ! Dhe çuditërisht askush nuk qanë kokën për këtë.

Më rastësisi sot të isha njëri prej personazheve të kësaj gjendjeje të mjerë, që ekziston në sportelet e pensionistëve të Prishtinës, ku  çdo i dyti pensionist dilte nga zyrat duke u ankuar e sharë, për shkak të padrejtësive që po u bëhen. Madje, më ndodhi edhe personalisht, që ankesën time të bërë nga  Agjencia për Ndihmë Juridike Falas, që vepron në kuadër të Ministrisë së Drejtësisë,  për mos përgjigje në afat ligjor, në ankesë, të mos ma pranojnë fare në sportelin numër 3, në zyrtat numër 4 dhe 1 në Prishtinë! Për dallim prej zyrave tjera, në zyrën nr. 1 personi që i thoshin drejtor, edhe ai ishte i befasuar për mospërgjigje në ankesat e qytetarëve në zyrat e Ministrisë, te Sheshi Zahir Pajaziti!

Këtë nuk do ta kisha besuar në asnjë mënyrë, sikur të mos më kishte ndodhur mua, që mu dashtë t’i humbas disa orë duke bredhur sa te Agjencia, sa te zyrat e pensioneve, sa të Ministria, për të përfunduar në postë.

Çfarë t’i thuhet kësaj? Anarki institucionale, kapje e shtetit apo pa aftësi në kryerjen e punëve! Si do që të jetë, kjo që po ndodhë para syve tanë, e për këtë heshtet, nuk do koment.