Reagim ndaj shpifjeve të portalit “Istogu Sot” , rreth mbajtjes së meshës tek Manastiri i Studenicës

Më 23 korrik 2025, në fshatin Studenicë të komunës së Istogut, u mbajt një Meshë Katolike, organizuar nga vetë shqiptarët e kësaj zone, të cilët me vullnet të lirë dhe të plotë janë rikthyer në besimin e tyre të vjetër – atë krishter-katolik. Kjo ishte një ngjarje shpirtërore e qetë dhe solemne, e zhvilluar pranë rrënojave të Kishës së vjetër shqiptare, në një vend me vlerë historike dhe kombëtare.

Kundrejt kësaj ngjarjeje, portali “Istogu Sot” ka publikuar një artikull shpifës, të pavërtetë dhe të motivuar politikisht, duke pretenduar se banorët e fshatit janë ndier të “provokuar”. Kjo është një gënjeshtër e pastër dhe një manipulim flagrant i realitetit.

E vërteta është kjo:

Kjo meshë u zhvillua në mënyrë paqësore, me pjesëmarrjen e shumë qytetarëve nga Studenica, përfshirë edhe besimtarë myslimanë, të cilët e përcollën me qetësi dhe respekt këtë akt solemn. Asnjë qytetar nuk është ndier i ofenduar apo i provokuar. Përkundrazi – kjo ngjarje dëshmoi bashkëjetesën e sinqertë fetare dhe ndjenjën e përbashkët të respektit për trashëgiminë kombëtare.

Në fakt, i vetmi që do të duhej të ndjehej i “provokuar” nga kjo meshë është shteti serb, i cili historikisht ka pretenduar padrejtësisht pronësinë mbi objekte të trashëgimisë fetare shqiptare – përfshirë Kishën e Studenicës.

Fshati Studenicë nuk ka pasur kurrë popullsi serbe, dhe çdo pretendim i Serbisë se kjo Kishë ka qenë “e tyre” është një falsifikim klasik i historisë, një manipulim i bërë për ta mohuar identitetin shqiptar të kësaj toke.

Mesha e mbajtur është një mesazh i qartë: Kisha e Studenicës është shqiptare – dhe do të mbetet shqiptare. Kushdo që del kundër mbajtjes së saj, apo kundër kthimit të kësaj trashëgimie te populli që e ndërtoi dhe e trashëgoi brez pas brezi, nuk është gjë tjetër veçse një zë pro-serb, që i shërben axhendave të huaja për të minuar themelet shpirtërore dhe historike të kombit tonë.

Kosova është një shtet laik dhe demokratik, ku liria e besimit dhe ushtrimi i tij janë të garantuara me Kushtetutë (neni 38), si dhe me aktet ndërkombëtare që mbrojnë të drejtat themelore të njeriut.

Askush nuk ka të drejtë të përhapë urrejtje, të nxisë përçarje apo të shpifë kundër një akti të shenjtë fetar, i cili është organizuar në paqe dhe në frymë të respektit të ndërsjellë.

Portale si “Istogu Sot”, që shpifin dhe manipulojnë me qëllime të ulëta politike apo fetare, duhet ta dinë:

Shpifja është vepër penale, e dënueshme sipas Kodit Penal të Kosovës (neni 391). Përhapja e gënjeshtrave me qëllim nxitjen e urrejtjes ndërfetare do të përballet me pasoja ligjore.

Kërkojmë:

• Tërheqjen e menjëhershme të lajmit shpifës;

• Kërkim-falje publike për deformimin e së vërtetës;

• Hetim nga organet përkatëse për nxitje të urrejtjes dhe shpifje publike.

Kujtojmë me zë të lartë: Kosova është shtet i të gjithë qytetarëve të saj, por historia e saj është shqiptare.

Trashëgimia fetare dhe kulturore shqiptare nuk do të nëpërkëmbet më nga askush.

Kisha e Studenicës është shqiptare – dhe mbetet shqiptare.

Mjaft më me shpifje. Mjaft më me agjenda të huaja.

Kombin nuk e ndal dot askush kur është në të drejtën e vet.

24.07.2025