Të dashur shqiptarë,
Dy dekada pas përfundimit të luftës në Kosovë, deputetët e Kuvendit të Republikës së Kosovës miratuan rezolutën lidhur me gjenocidin që Serbia kreu kundër shqiptarëve të Kosovës gjatë periudhës 1998-1999.
Nga ky aspekt, viti 2019 shënon një kthesë të rëndësishme, sepse krimet e kryera gjatë luftës në Kosovë zyrtarisht përkufizohen si gjenocid.
Ajo që është shpresëdhënëse, kjo rezolutë shpreh vendosmërinë e institucionit ligjvënës të Kosovës, që të ndërmerren të gjitha masat e nevojshme në rrafshin ndërkombëtar dhe atë kombëtar, me qëllim që të sigurohet ndëshkimi i atyre që kanë planifikuar, që kanë kryer apo që kanë nxitur të kryhet gjenocidi.
Më 16 nëntor 2022, Qendra “Gjenocidi në Kosovë – Plagë e hapur” i është drejtuar institucioneve të Kosovës me një kërkesë që, lulëkuqja me katër petale, të bëhet simbol unik përkujtimor i gjenocidit në Kosovë.
Kjo nismë hasi në përkrahje të jashtëzakonshme të intelektualëve të shquar të hapësirës mbarëkombëtare (personaliteteve të kulturës, artit, shkencës dhe sportit); të institucioneve shkencore; udhëheqës partish politike; deputetë të Kuvendit të Kosovës; shoqata anekënd globit tokësor etj. Në nivel të pushtetit lokal, asambletë e 21 komunave të Kosovës e miratuan pothuajse në mënyrë unanime që lulëkuqja me katër petale, të bëhet simbol unik përkujtimor i gjenocidit në Kosovë.
Duke u përballur me mohimin e vazhdueshëm të gjenocidit nga ana e shtetit serb, Qendra “Gjenocidi në Kosovë-Plagë e hapur” do të vazhdojë me angazhimet e veta me qëllim që e vërteta për gjenocidin kundër shqiptarëve në Kosovë të pranohet botërisht.
Vetëm duke u angazhuar për të ngadhënjyer drejtësia për të gjitha viktimat e gjenocidit, për ata mijëra fëmijë, gra, pleq, plaka dhe shqiptarë të të gjitha moshave që u vranë mizorisht nga forcat e armatosura të Serbisë, për ato dhjetëra mijëra femra shqiptare të përdhunuara seksualisht dhe për poshtërimet që u janë bërë rreth 1 milion shqiptarëve të dëbuar nga vatrat e tyre, ne mund t’i urojmë njëri-tjetrit një vit të ri të përpjekjes për të mbyllur plagën e gjenocidit që kullon gjak, dhembje dhe vuajtje të qindra mijëra familjeve shqiptare.
Qendra “Gjenocidi në Kosovë-Plagë e hapur” ju uron Vitin e Ri 2024, me shpresë që angazhimet tona individuale dhe kolektive të kurorëzohen me rezultate pozitive në përpjekjet për të ngadhënjyer drejtësia.
Gjenevë, 31 dhjetor 2023
Qendra “Gjenocidi në Kosovë – Plagë e Hapur”
