TV Klan Kosova – Komercializim ekstrem dhe mungesë e politikës redaktuese

Arif Ejupi, Gjenevë

Edicioni i mbrëmshëm i lajmeve qendrore në Klan Kosova e vërtetoi edhe njëherë se ky televizion ka rrëshqitur plotësisht drejt komercializimit, duke ia dorëzuar përgjegjësinë redaktuese marketingut, e jo standardeve profesionale të gazetarisë.

Në një ditë kur gjenerali Wesley Clark – njeriu që luajti rol kyç në çlirimin e Kosovës si komandant i fushatës së NATO-s, më 1999,dha dëshminë e tij historike në Gjykatën Ndërkombëtare në Hagë, ngjarje që duhej të ishte kryelajm absolut i të gjitha mediave në vend, TV Klan Kosova e trajtoi atë si lajm të dorës së dytë.
Kjo dëshmi nuk është vetëm një proces gjyqësor; ajo është dëshmi për historinë, për drejtësinë ndërkombëtare dhe për fatin e Kosovës.

Po çfarë zgjodhi TV Klan Kosova?
Në vend që deklarata e Clarkut të transmetohej në hapje të edicionit, ajo u shty deri rreth minutës së 20-të, si një lajm i zakonshëm dhe pa peshë politike.

Ndërkaq, si kryelajm u dha fillimi i edicionit të ri të formatit “Big Brother”, një show argëtues i pastër komercial, i cili nuk ka asnjë lidhje me interesat madhore të vendit.

Ky është një shembull tipik se si një televizion që pretendon të jetë ndër më të ndjekurit, i ka humbur prioritetet themelore të lajmit. Në vend se të pasqyrojë çështje me peshë kombëtare, ai zgjedh të spektakolarizojë argëtimin, thashethemet dhe dinamikat e një reality-show-u.

Kjo qasje tregon se sensacionalizmi dhe argëtimi po e zëvendësojnë lajmin me interes kombëtar, ndërsa pesha historike dhe politike e zhvillimeve të rëndësishme shtyhet në periferi të vëmendjes.

Një media që e trajton gjeneralin Clark si lajm dytësor është media që nuk e kupton lirinë nga e cila përfiton çdo ditë. Është media pa ndërgjegje kombëtare, pa përgjegjësi publike, pa moral gazetaresk.

Ajo që ndodhi mbrëmë nuk është gjë tjetër veçse: dekadencë morale, dështim profesional dhe përbuzje ndaj historisë.