KRYEMINISTRI I KOSOVËS NUK ËSHTË PREDIKUES FETAR!
____
Kur kryeministri i Kosovës, Albin Kurti, nga një konferencë zyrtare, deklaron «Të gjithë e takofshim ishalla në xhenet» dhe «Vatan dhe iman shkojnë bashkë», ai duhet ta kuptojë se nuk po flet vetëm si individ, por edhe si bartës i një detyre kushtetuese që kërkon neutralitet ndaj besimeve fetare.
Kosova është shtet laik. Kryeministri nuk është përfaqësues i një feje, por i të gjithë qytetarëve, pavarësisht nëse janë myslimanë, katolikë, ortodoksë, të besimeve të tjera apo ateistë.
Detyra e tij nuk është ta ndërthurë autoritetin shtetëror me gjuhën fetare, por ta ruajë shtetin neutral dhe shoqërinë të lirë nga imponimi i dogmave fetare.
Besimi është e drejtë personale. Shteti është i përbashkët. Patriotizmi nuk ka nevojë për certifikatë fetare dhe dashuria për atdheun nuk matet me iman.
Kur një kryeministër e lidh publikisht atdheun me besimin fetar, duhet të kuptojë se Kosova nuk u përket vetëm besimtarëve dhe asnjë feje të vetme. Ajo u përket të gjithë qytetarëve të saj.
Neni 8 i Kushtetutës nuk është dekor. Laiciteti nuk është slogan për fushata, por detyrim kushtetues.
Kryeministri duhet ta respektojë këtë parim jo vetëm në letra, por edhe në paraqitjet e tij publike. Shteti nuk duhet të predikojë, feja nuk duhet të diktojë dhe politika nuk duhet t’i përdorë institucionet për ta normalizuar gjuhën e dogmës fetare.
Kosovës i duhen institucione që mbrojnë lirinë e ndërgjegjes, jo autoritete që mjegullojnë kufirin ndërmjet shtetit dhe fesë.
Feja është çështje personale. Shteti është i të gjithëve. Shqiptaria është trashëgimi e përbashkët.
Laiciteti nuk negociohet!
