Shtupe YouTube, për ta parë videon:

Presidentja e Republikës së Kosovës, Vjosa Osmani, sot ka pranuar letrat kredenciale nga ambasadori i ri i Mbretërisë së Bashkuar në Kosovë, Jonathan Hargreaves. 

Pasi që i ka uruar mirëseardhje ambasadorit të ri britanik, Presidentja Osmani ka theksuar se marrëdhëniet ndërmjet të dy shteteve janë të shkëlqyeshme dhe shfaqi besimin se zhvillimet pozitive të raporteve bilaterale ndërmjet Kosovës dhe Mbretërisë së Bashkuar do të vazhdojnë edhe gjatë mandatit të ambasadorit Hargreaves.Në takim u diskutua për zhvillimet e fundit politike dhe të sigurisë në vend, si dhe për procesin e dialogut me Serbinë.

Presidentja Osmani ka theksuar se Mbretëria e Bashkuar është një aleate e fuqishme, e cila e ka përkrahur Kosovën në të gjitha etapat dhe në përballje me të gjitha sfidat. 

 “Ju shpreh mirënjohjen tonë të thellë për mbështetjen e vazhdueshme të Mbretërisë së Bashkuar në forcimin e pozitës ndërkombëtare të Kosovës. Së fundmi, na nderoi vizita e kryeministrit Cameron në Kosovë, i cili na mbështeti dhe theksoi se forcat e Mbretërisë së Bashkuar janë këtu për ta mbrojtur Kosovën dhe sovranitetin e saj”, ka theksuar Presidentja Osmani.

Të dy bashkëbiseduesit diskutuan për mundësitë e bashkëpunimit për fuqizimin e grave dhe pavarësinë ekonomike të tyre, ndërkohë që Presidentja Osmani e njoftoi ambasadorin Hargreaves për edicionin e dytë të Forumit për Gratë, Paqen dhe Sigurinë, i cili pritet të mbahet më 15-16 prill.

Presidentja Osmani ka falënderuar Mbretërinë e Bashkuar për mbështetjen e deritashme dhe ka shtruar nevojën e thellimit të bashkëpunimit në fusha të ndryshme, duke përfshirë mbrojtjen, tregtinë, investimet, arsimin si dhe fusha të tjera të interesit të dyanshëm.

Prishtinë, 5 mars 2024

Në kuadër të programit të manifestimit shtetëror për shënimin e 26-vjetorit të Epopesë së Ushtrisë Çlirimtare të Kosovës, Kryeministri i Republikës së Kosovës, Albin Kurti mori pjesë në ceremoninë e rreshtimi të kuadrateve të Forcës së Sigurisë së Kosovës që u mbajt në Kazermën “Adem Jashari”. 

Fjala e plotë e Kryeministrit Kurti:

E nderuara Presidente e Republikës së Kosovës, znj. Vjosa Osmani Sadriu,

I nderuari Kryetar i Kuvendit të Kosovës, z. Glauk Konjufca,

I nderuari baca Rifat, Rifat Jashari,

Të nderuar zëvendëskryeministra, ministra dhe deputetë,

I nderuar Komandant i Forcës së Sigurisë së Kosovës, Gjeneral-lejtnant Bashkim Jashari,

Shkëlqesi ambasadorë e përfaqësues diplomatik të vendeve mike,

Të nderuara familje të dëshmorëve të kombit,

Të nderuar invalidë dhe veteranë të luftës çlirimtare,

Të nderuar ushtarakë të Forcës së Sigurisë së Kosovës,

Të nderuar partnerë të organizatave ndërkombëtare dhe vendore,

Të dashur qytetarë të Republikës,

Zonja dhe zotërinj,

Motra dhe vëllezër,

Si në çdo mars, ne jemi këtu në një nga vendet më të duhura për kujtimin dhe kuptimin e Epopesë së UÇK-së. Ky vend mban emrin e duhur dhe njerëzit e duhur. Në një vend çlirimtarësh, ushtria është vendi i drejtë për ta përkujtuar Epopenë.

Ne e njohim historinë tonë. Ne e vlerësojmë historinë tonë, sepse ajo është e dendur në emra dhe në vepra. Ne e nderojmë historinë tonë sepse e njohim në tërësinë e shoqërisë, ngado ku shkojmë nëpër botë me historinë tonë në zemër, brenda çdo pragu në familje tona këtu e në mërgatën tonë kudo atje që ndodhet. Ne jemi shumë sepse bartim në mendje emrat e shquar. Secili është më shumë se vetvetja, e ajo që jemi më shumë se vetvetja, na bën të gjithëve bashkë. Kjo na jep besim e besë, jetë dhe shpresë. Shumë nga ju janë bij të dëshmorëve e të luftëtarëve, ose të qëndrestarëve nëpër burgjet jugosllave e serbe.

Të nderuara ushtarake dhe ushtarakë,

tani epoka po flet ndryshe. Së pari sepse ne jemi shtet i pavarur dhe kemi ushtrinë tonë. Ne jemi shteti i një populli gjithnjë liridashës dhe mbrojtës i kampit të drejtësisë, shteti i një shoqërie që synon zhvillimet perëndimore e demokratike të lirive. Ne jemi pjesë e një kombi që mbron me ushtrinë e vet idenë dhe praktikën e drejtësisë dhe të lirisë. E nuk ka në këtë jetë njerëzore lavd më të madh se qëndrimi nga ana e drejtësisë dhe lirisë.

Së dyti, sepse epoka dhe vetëdija botërore po ndryshojnë. Po kuptohet ngado në kancelaritë e fuqishme se ledhatimi i padrejtësisë nuk e sjell kurrë paqen, por të kundërtën e saj, korruptimin e shoqërive dhe luftën mes popujve. Paqja dhe padrejtësia nuk mund të bashkëjetojnë.

Paqja duhet të jetë e qëndrueshme dhe afatgjatë për t’i mundësuar popujve të nxjerrin më të mirën e tyre. Ju duhet ta shihni e vlerësoni veten si një trup e një mendje, si një ushtri që i është shtuar shoqërive që mbrojnë demokracinë dhe paqen. Ne i mbahemi një ideali të kulluar të Epopesë dhe të Jasharëve. E kush i mbahet një ideali të kulluar del gjithnjë fitues. Kjo është fryma e Epopesë së UÇK-së. E për këtë duhet të jemi të gjithë krenarë dhe të dijshëm. Të dijshëm, kjo është deviza: guximi është trimëri dhe dije. Edukimi i ushtarakut duhet të jetë i plotë, duhet të jetë guxim. Sepse ushtaraku mbron një popull të tërë. Ushtaraku është shprehja e mbrojtjes së ndërgjegjshme të vizionit të një populli të tërë, në të drejtën e tij të gjithkohshme. Aq më shumë kur populli i përket një shoqërie dhe shteti nga ana e kampit të drejtësisë e demokracisë.

Të nderuar ushtarakë,

ju jeni shprehje e qartë e seriozitetit tonë në arenën ndërkombëtare.

Skena globale do të na ofrojë sërish e gjithnjë situata krizash dhe shtete të korruptuar. Ne duhet t’i ofrojmë skenës globale guxim dhe ndershmëri. Sepse ky është shërbimi ynë i vetëm për të ardhmen tonë shtetërore dhe paqen e përgjithshme. Sa më shumë ofrojmë sjelljen tonë cilësore institucionale dhe shtetërore, aq më shumë aleancat do të jenë të qëndrueshme dhe bindëse.

Shtetet evropiane, në kontinentin ku ne përkasim, po e kuptojnë rrezikun më qartë se kurrë. Aleanca më e madhe ushtarake e historisë po ngjallet në tema dhe në strategji. Ne po marrim pjesë aktivisht në këtë kahje. Synimi ynë për anëtarësim në NATO është bërë i qartë publikisht prej qeverisë sonë dhe po bëjmë hapa të përditshëm drejt cakut. Ky synim është shpallur më shumë se kurrë me mbështetjen e hapur qeveritare për modernizimin dhe rritjen e ushtrisë sonë.

Ushtrinë të cilën e kemi më të fortë se kurrë. Në 2023, buxheti për mbrojtjen ishte më i larti ndonjëherë, mbi 200 milionë euro, apo më shumë se 2% e Bruto Produktit Vendor që është kriter i NATO-s.

E kemi rritur numrin e ushtarëve duke i shtuar 1852 ushtarë të rinj në dy vitet që shkuan dhe 600 të tjetër i kemi paraparë për këtë vit. Investimet në armatim po ashtu i kemi rritur, madje për gati trefish. Jemi pajisur me Dronë Luftarakë Bayraktar, e po pajisemi edhe me sistemin raketor antitank “Javelin”, ndërkaq trajnimet jashtë vendit për juve ushtarakë të dashur i kemi katërfishuar.

Rritja e kapaciteteve mbrojtëse do të jetë prioriteti i lartë i Ministrisë së Mbrojtjes edhe këtë vit, krahas bashkëpunimit ndërkombëtar me miq, partnerë e aleatë.

Të nderuar të pranishëm, të dashur ushtarakë,

Një shtet ka domosdoshmërinë e diplomacisë, por edhe të ushtrisë së tij. Rasti i Ukrainës ia ka zbuluar tërë Perëndimit faktin e thjeshtë. Degjenerimi i shoqërive mund të marrë përmasa diktaturash duke e humbur mundësinë e dialogut të bazuar mbi vlera. Dialogu bëhet mbi të njëjtat vlera, parime dhe besime në njerëzim. Ne e dimë se demokracia dhe triumfi i saj nuk ka nevojë jetike vetëm për harmoninë ekonomike, por edhe për harmoninë e parimeve politike, demokratike. Asnjë vonesë në rrafshin e parimeve politike të demokracisë nuk mund të zgjidhet me shkëmbime tregtare dhe kontrata biznesi.

Demokracia nuk mbrohet nga miqësitë tregtare dhe financiare me shtetet jo-demokratike. Sepse vjen një ditë dhe shtetet autokratike dhe oligarkike nuk e përdorin pasurimin ekonomik për mirëqenien e popujve të vet, dhe e përdorin atë për kërcënimin e popujve të tjerë. Ne kemi ditur gjithnjë dhe e kemi thënë vazhdimisht se paqes i duhet shërbyer përditë. Vigjilenca e parimeve dhe mbrojtja e virtyteve të institucioneve demokratike është punë e përditshme e të gjithë neve, e secilës dhe e secilit prej nesh.

Ne shpresojmë dhe besojmë fuqishëm se shtetet më të fuqishëm të Perëndimit, tashmë e kanë kuptuar se duhet ta mbrojnë me çdo kusht demokracinë dhe paqen, drejtësinë dhe lirinë. Dhe në fushën e luftës për liri dhe në paqe me demokraci ne jemi model. Emri i kazermës suaj e dëshmon më lavdishëm se kurrë ndërmarrjen tonë të përbashkët.

Lavdi Kryekomandantit Adem Jashari, familjes Jashari, Ushtrisë Çlirimtare të Kosovës, dëshmorëve të kombit dhe të gjithë mbrojtësve të drejtësisë, të hershëm dhe të tanishëm, të vdekur e të gjallë!

E nderimin më të lartë: për atdheun dhe ushtrinë tonë!

Prishtinë, 5 mars 2024

Kuvendi i Republikës së Kosovës, në kuadër të programit të manifestimit shtetëror për shënimin e 26-vjetorit të Epopesë së Ushtrisë Çlirimtare të Kosovës, mbajti sot seancë solemne. 

Fjala e plotë e kryeministrit Kurti në seancën solemne të Kuvendit për shënimin e 26-vjetorit të Epopesë së Ushtrisë Çlirimtare të Kosovës: 

E nderuara Presidente e Republikës së Kosovës, znj.Vjosa Osmani Sadriu, 

I nderuari Kryetar i Kuvendit të Kosovës, z.Glauk Konjufca, 

I nderuari baca Rifat Jashari, 

Të nderuar deputetë të Kuvendit të Republikës së Kosovës, zëvendëskryeministre e ministra të Qeverisë, 

I nderuari President Fatmir Sejdiu,

Shkëlqesi ambasadorë, diplomatë e miq ndërkombëtarë, 

Të nderuara familje të dëshmorëve, invalidë e veteranë të luftës çlirimtare, 

Të nderuar prijës fetar, udhëheqës e përfaqësues të institucioneve, 

Të dashur qytetarë të Kosovës, 

Zonja dhe zotërinj,  

Ja ku sërish vjen marsi dhe ne mbledhemi për t’i kujtuar ditët e 5, 6 dhe 7 marsit të vitit 1998, si data të tre ditëve kur populli i Kosovës bëri një kapërcim të madh në rrugën e tij të gjatë për liri. Çdo vit më 5 apo 6 mars, si për asnjë tjetër rast dhe si për asnjë tjetër figurë, Kuvendi i Kosovës mbledhet në seancë të veçantë për ta kujtuar betejën e rezistencën e flijimin e Adem Jasharit dhe të familjes së tij në Prekaz më 5, 6 dhe 7 mars të vitit 1998. Kjo tashmë është një praktikë zyrtare institucionale e konsoliduar dhe e vazhdueshme.   

Shumë ngjarje me rëndësi historike, pasohen nga tradita të themeluara për kujtim dhe nderim të tyre, por vetëm ato që kanë përmbajtje të vërtetë burimore dhe potencial shpërthyes, arrijnë të kthehen në tradita të mirëfillta kombëtare ndër breza. Në rastin e qëndresës së Jasharëve të Prekazit, kjo provë është kaluar suksesshëm qysh para 25 vitesh, kur në njëvjetorin e kësaj qëndrese, më 6 mars të vitit 1999, Trupa Artistike “Hamëz Jashari” e UÇK-së, e ideoi shënimin e parë të Epopesë së Ushtrisë Çlirimtare të Kosovës. Kështu, manifestimi që ka nisur qysh në mars të vitit 1999, nën zjarrin e luftës, në njëvjetorin e luftimeve në Prekaz dhe ku e mori emrin Epopeja e UÇK-së, ndër vite ka zënë vend brenda institucioneve të Republikës së Kosovës, deri sot kur po e shënojmë 26-vjetorin e saj.

Epopeja e UÇK-së, përkatësisht historia e luftës së armatosur së Adem Jasharit, së familjes Jashari të Prekazit dhe të gjithë atyre që ecën bashkë me ta dhe pas tyre në rrugën e çlirimit, përmbledhin një trashëgimi të madhe politike, kulturore dhe kombëtare, nga e cila ka ardhur liria e Kosovës dhe mbi të cilën është ndërtuar edhe vet shteti i saj.  

Kosova është çliruar prej Serbisë okupatore, pikërisht nëpërmjet trashëgimisë politike që e prodhoi personalitetin dhe figurën e Adem Jasharit, nga po kjo trashëgimi është ngritur dhe po ndërtohet dhe po forcohet edhe shteti ynë. E kam fjalën për trashëgiminë e dalë nga kultura e rezistencës së armatosur dhe e aktivizmit të kulluar politik, sidomos që nga Lidhja e Prizrenit e këtej, që i ka karakterizuar shqiptarët dhe veçanërisht Kosovën. Sepse vërtetë rezistenca e Jasharëve të Prekazit është unike në vetvete, por ajo nuk është pa referenca në historinë e shqiptarëve, siç nuk është e pa trasueshme edhe më tutje, madje edhe sot.

Rezistenca e Adem Jasharit dhe e UÇK-së, është produkt i natyrshëm i po asaj kulture të kryengritjes dhe luftëtarëve vullnetarë që luftuan për mbrojtjen e trevave shqiptare nën organizimin e Lidhjes Shqiptare të Prizrenit. Është rezistencë e po asaj kulture që solli organizimin e kryengritjeve kundër sundimit të Perandorisë Osmane dhe të agresionit të Serbisë të prira nga Hasan Prishtina më 1910, 1911 dhe 1912. Ajo është e njëjta kulturë që e ngjizi dhe e kultivoi lëvizjen e Azem Bejtës dhe të Shaban Polluzhës në gjysmën e parë të shekullit XX. E njëjta kulturë dhe traditë, që në vitet më të egra të pushtimit të Kosovës nga Serbia, kur organizimet masive ishin të pamundura, rilindi e u shfaq shumë herë mes individësh sikur edhe te vet mësuesi Shaban Jashari, që familjen e tij të madhe e ktheu në një projekt të madh kombëtar për shqiptarët dhe për çlirimin. 

Në një kohë kur dukej që ishte e pamundur të shkëputeshe nga kthetrat e regjimit kriminal të Serbisë dhe kur besohej se kishte përfunduar epoka e shtetformimeve në Evropë, këmbëngulësia e Adem Jasharit dhe e shokëve të tij luftëtarë për ta çliruar Kosovën, krijoi kushtet e mundësisë për çlirimin e Kosovës dhe shpalljen e pavarësisë së saj më pas. Sot në Republikën e Kosovës, liria për të cilën kishte luftuar deri në vdekje Adem Jashari, është bërë paradigma bazë e jetës dhe e ligjeve të një shoqërie moderne.

Vjet e shënuam 25-vjetorin e Epopesë së UÇK-së, kurse sivjet do ta shënojmë 25-vjetorin e çlirimit të Kosovës në qershor të vitit 1999, duke i përkujtuar betejat e Ushtrisë Çlirimtare të Kosovës, vrasjet, masakrat dhe spastrimin etnik të kryer nga Serbia e udhëhequr nga një regjim gjenocidal mbi shqiptarët në Kosovë dhe me ndihmën e aleatëve që u çliruam bashkërisht 25 vjet më parë. E në këtë histori të çlirimit dhe të shtendërtimit, Adem Jashari dhe krejt çfarë përfaqëson figura e tij, ka një hise shumë të madhe, që në të vërtetë është hisja më e madhe që mund ta ketë një njeri në historinë e vendit dhe të kombit të tij. Ajo është hisja e një njeriu që brenda kohës së tij dhe qenies së tij vepruese, lirinë e tij individuale e përbashkoi me lirinë e popullit të tij, gjatë gjithë jetës, deri në vdekje, deri në rënien heroike. Liria ishte kushti i jetës e që u bë edhe kushti i vdekjes së Adem Jasharit. Andaj, nëse historia është përparimi i vetëdijes së popujve për liri, atëherë Adem Jashari është emri i përveçëm i njeriut me të cilën ne mund t’i referohemi lirisë sonë! 

Lavdi dhe mirënjohje e thellë e pafund Adem Jasharit, familjes Jashari, Ushtrisë Çlirimtare të Kosovës, dhe të gjithë dëshmorëve të kombit!