Liri Loshi
Albin Kurti nuk do ta pranojë një Asociacion me kompetenca ekzekutive të komunave serbe. Sepse, po ta bënte këtë, do të ishte fundi i tij politik. Një asociacion të tillë tashmë nuk e pranon asnjë parti opozitare e nuk e pranon (mirëpret) as SHBA-ja. Së fundi, edhe BE-ja u deklarua kundër një “Republika srpska” në Kosovë që nënkupton se nuk insiston në një Asociacion me komptenca ekzekutive. I njëjti Lajçak një vit më parë kishte deklaruar se Kushtetuta nuk është bibël që nënkuptonte ndërrimin e Kushtetutës së Kosovës, e cila shumë qartë i ka kundërshtuar krejt kompetencat ekzekutive të Asociacionit.
Ky moment shënon fitoren politike të Kosovës, për herë të parë pas aq shumë vitesh dialogu e inferioriteti ndaj Serbisë. Kjo fitore i atribuohet pikërisht Albin Kurtit si lider dhe Vetëvendosjes si subjekt politik. C’është e vërteta, vetëm Albin Kurti ka pasur dhe ka kredo morale për ta kundërshtuar Asociacionin e komunave serbe me kompetenca ekzekutive, meqë vetëm ai dhe subjekti i tij politik e kaneë kundërshtuar vazhdimisht atë. Liderët e partive që kanë nënshkruar dhe votuar (ratifikuar) një asociacion të tillë, nuk kanë kredo morale për ta kundërshtuar të njëjtin.
Deklarata e Albin Kurtit në përgjigje të Miroslav Lajçak se ai nuk i frikësohet zbatimit të Asociacionit, por është i kujdesshëm në këtë drejtim, nuk nënkupton se ai do t’i japë vizën zbatimit të një asociacioni antikushtetues. Tani është momenti për të vepruar pozitë dhe opozitë për të ardhur deri të një zgjidhje qe si norme ka një model asociacioni të komunave serbe pa kompetenca ekzekutive. Më në fund topi ka kaluar në anën tonë dhe ky moment duhet shfrytëzuar.
