Lirim Gashi, Prishtinë
___
Aq sa jam pafundësisht i interesuar për vazhdimin e versionit të përmirësuar në çdo aspekt, të qeverisjes së dyshes Albin Kurti & Vjosa Osmani, për herë të parë kam dyshimet e mia të arsyeshme se nëse nuk do të kenë rezultate konkrete, të dukshme dhe të prekshme në politikat e tyre sociale, të investimeve dhe të punësimit, si dhe në zbatimin e Asociacionit të Komunave Serbe në përputhje me Kushtetutën e Kosovës, ata jo vetëm që nuk do ta ruajnë shumicën aktuale në Kuvend, por edhe do ta humbasin duelin e drejtpërdrejtë me LDK-në në zgjedhjet e ardhshme parlamentare.
Ju lutem ta kuptoni mesazhin e këtij shkrimi si një paralajmërim në kohë të duhur dhe ta përktheni si një detyrim për marrjen e masave parandaluese, sepse pas tij fshihet një qëllim i mirë, fisnik, i ndershëm dhe i dobishëm kombëtar dhe shtetëror.
Jo vetëm familjarët dhe miqtë e mi të ngushtë, por edhe lexuesit e mi besnikë që i kanë përcjellë me shumë vëmendje parashikimet e mia në dhjetëvjeçarin e kaluar, e dinë shumë mirë se ato janë më të sakta se të çdo instituti vendor dhe ndërkombëtar për hulumtimin e opinionit publik.
Drejtimi i politikës shtetërore nuk duhet të shërbejë si qëllim në vetvete për krerët në pushtet dhe për partitë e tyre politike, por duhet të sjellë rezultate konkrete që ua lehtësojnë jetën qytetarëve dhe që e rrisin sigurinë e shtetit.
Nëse nuk është kështu, lidhja emocionale e votuesve me një ose dy liderë premtues do të dobësohet dhe do të mbizotërojë zhgënjimi dhe pakënaqësia.
Ju lutem mos lejoni që gjendja emocionale e votuesve të arrijë deri në atë pikë, sa ata t’i lidhin shpresat e tyre me reliktet e pasuksesshëm politikë nga kohërat e kaluara.
Apo edhe më saktë, ju lutem mos u ndjeni shumë të sigurt në kotlluqet tuaja, sepse vetëkënaqësia është versioni më injorant i arrogancës.
Mos i fëlliqni brekët nga frika, por na dëshmoni se u zgjodhët me plebishit për shkak të guximit dhe aftësive tuaja, e jo për shkak të pamjes suaj të bukur dhe premtimeve tuaja boshe.
Gjendja është aq e mirë në thonjëza, saqë ende pa hyrë në fuqi liria e vizave, shqiptarët tashmë kanë krijuar “chate private” në rrjetet e ndryshme sociale për ta informuar njëri-tjetrin se në cilat kushte pak më të volitshme mund të largohen përgjithmonë nga vendlindja e tyre për t’u vendosur në Evropën Perëndimore dhe për ta gjetur ndonjë punë pak më të përshtatshme.
Dhe ky fakt do të duhej ta alarmonte çdo qeveri normale në botë, sepse gjithçka që do të lënë pas në shtëpitë e tyre ushtarët e armatës së gatshme për ikje Kosova, janë gjyshet dhe gjyshërit e tyre të palëvizshëm nga pleqëria, që nuk do të mund të shkojnë në këmbë as deri te kutitë e votimit në zgjedhjet e ardhshme parlamentare.
