Në shërbim të kujt janë Epoka e Re, Korrekt Press dhe disa portale të tjera?
Fushatat e koordinuara të dezinformimit dhe diskreditimit kundër Lëvizjes së Deçanit nuk kanë të ndalur. Sa herë që u krijohet rasti, disa media dhe portale nxitojnë të publikojnë tituj sensacionalë, pa u shqetësuar për saktësinë e informacionit, për etikën profesionale apo për pasojat që sjell dezinformimi i opinionit publik.
Edhe kësaj radhe, pas disa ditësh heshtjeje, u rikthyen me të njëjtën skemë propagandistike. Duke u kapur pas dënimit të një personi që nuk ka lidhje me Lëvizjen e Deçanit, publikuan tituj bombastikë si:
“Gjykata shpall fajtor dhe dënon një anëtar të Lëvizjes së Deçanit!”Ky është një shembull tipik se si ndërtohen narrativat për të dëmtuar një lëvizje kombëtare. Në vend të raportimit të fakteve, zgjidhet manipulimi i opinionit publik.
Në të njëjtën frymë veproi edhe Epoka e Re, duke publikuar lajmin e rrejshëm:
“Fillon shpërbërja e Lëvizjes së Deçanit, jep dorëheqje njëri nga themeluesit, Pajazit Jashari.”
Ky pretendim nuk qëndron. Vetë Pajazit Jashari e ka deklaruar publikisht në disa raste se nuk ka qenë pjesë e Lëvizjes së Deçanit dhe nuk ka të bëjë fare me te. Atëherë lind pyetja e natyrshme: a kemi të bëjmë me mungesë profesionalizmi apo me një përpjekje të qëllimshme për ta goditur këtë lëvizje?
Kur i njëjti model i raportimit përsëritet vazhdimisht dhe objektivi mbetet gjithmonë i njëjtë, qytetarët kanë të drejtë të shtrojnë pyetjen: në interes të kujt zhvillohen këto fushata? Kush përfiton nga përhapja e lajmeve të pavërteta dhe nga përpjekjet për ta paraqitur Lëvizjen e Deçanit në një dritë të rreme?
Për ne është e qartë se këto sulme nuk janë shenjë force, por shenjë frike. Frikë nga një lëvizje që po fiton mbështetje gjithnjë e më të madhe në Kosovë, në të gjitha trojet shqiptare dhe në mërgatë. Sa më shumë rritet përkrahja për Lëvizjen e Deçanit, aq më agresive bëhen fushatat e saj të kundërshtarëve.
Historia ka treguar se propaganda mund të krijojë zhurmë, por nuk mund ta mposhtë të vërtetën. Gënjeshtrat mund të qarkullojnë për një kohë, por faktet mbesin.
Prandaj, u bëjmë thirrje të gjitha mediave që ta ushtrojnë profesionin me përgjegjësi, të respektojnë të vërtetën dhe standardet e gazetarisë, e jo të bëhen instrument i propagandës politike apo i interesave të caktuara.
Ndërsa atyre që vazhdojnë të shpifin dhe të dezinformojnë, ua bëjmë të qartë se koha e tolerimit ka marrë fund. Çdo shpifje dhe çdo dezinformatë që dëmton reputacionin e Lëvizjes së Deçanit dhe të përfaqësuesve të saj do të ndiqet me të gjitha mjetet që lejon ligji. Liria e shprehjes nuk është dhe nuk mund të jetë mburojë për shpifjen dhe dezinformimin.
