Fazli Hajjdaraj, zyrtar dhe veprimtar i LDK-së që nga themelimi i saj
___
Reagim
Si veprimtar dhe zyrtar i vjetër i LDK-së, që kam ushtruar funksione të ndryshme ndër vite dhe kam kontribuar në kohë të vështira e vendimtare për partinë, ndjej obligim moral dhe politik të reagoj ndaj gjendjes së krijuar së fundmi në LDK.
Është e papranueshme që çështje kaq të ndjeshme dhe me pasoja për të ardhmen e partisë të trajtohen me improvizime, deklarata emocionale dhe luftëra në rrjetet sociale. Rikthimi i Vjosa Osmanit në LDK është një temë për të cilën, sipas shumë zërave brenda partisë, nuk ka pasur pajtim të gjerë. Dhe është e qartë se një pjesë e konsiderueshme e anëtarësisë nuk e ka mbështetur një qasje të tillë. Kjo kërkonte debat të hapur dhe vendimmarrje institucionale, jo imponime apo kalkulime të ngushta politike.
Nga ana tjetër, po aq të papranueshme janë kërkesat e degëve të Pejës, Lipjanit dhe Degës së Dytë në Prishtinë për dorëheqjen e kryetarit Lumir Abdixhiku përmes rrjeteve sociale dhe deklarimeve publike. Nëse ekzistojnë pakënaqësi reale, LDK ka organe, statut dhe mekanizma të qartë për trajtimin e tyre. Nuk mund të kërkohet përgjegjësi institucionale duke shkelur vetë parimet institucionale.
LDK nuk mund të shndërrohet në arenë për hesapet personale të askujt. Ata që marrin vendime pa konsultim të gjerë gabojnë rëndë, por po aq gabojnë edhe ata që kërkojnë rrëzimin e lidershipit përmes Facebook-ut e mediave, duke dëmtuar imazhin e partisë para qytetarëve. Të dyja palët po kontribuojnë në dobësimin e LDK-së dhe po largojnë vëmendjen nga problemet reale me të cilat përballet Kosova.
Sot, më shumë se kurrë, LDK ka nevojë për maturi, përgjegjësi dhe respekt për institucionet e saj. Kushdo që mendon se mund ta marrë peng partinë për interesa personale apo grupore duhet ta kuptojë se LDK është më e madhe se çdo individ, qoftë ai kryetar, ish-funksionar apo drejtues dege.
Prandaj, kërkoj nga të gjitha palët të ndalin menjëherë luftën publike, të respektojnë organet e partisë dhe të ballafaqohen me argumente aty ku e kanë vendin – në forumet e LDK-së. Çdo veprim tjetër është papërgjegjësi politike dhe tradhti ndaj besimit që anëtarësia dhe elektorati i kanë dhënë ndër vite kësaj force politike.
LDK nuk ka nevojë për spektakle, por për përgjegjësi. Nuk ka nevojë për luftëra klanore, por për unitet. Dhe mbi të gjitha, nuk ka nevojë për njerëz që e përdorin partinë për interesat e tyre, por për njerëz që i shërbejnë asaj me dinjitet dhe ndershmëri.
—
Shënim: E nderuara Redaksi “Revista Drini”, po ju dërgoj këtë shkrim të ish-kryetarit të Nëndegës për Republikën e Rheiland Pfalz, Gjermani, të LDK-së tani kryetar i një Nëndege në Rheinen Pfalz, njëherësh vëlla i deputetit të ekekutuar – Smajl Hajdaraj.
Mendoj se është një shkrim i balancuar, për palët në mospajtime politike në LDK.
Uroj për mirëkuptim – Idriz Zeqiraj
