Ju që sot bashkëjetoni me sistemin kleptokratik, që është shndërruar në normë, dhe nuk ngriheni kundër tij për të ndërtuar një shtet të drejtë, nesër do të mbeteni vetëm – ashtu siç mbetën shumë prindër atje, që vdesin edhe për një gotë ujë, sepse s’kanë askënd pranë vetes.
Ju që e kritikoni me fjalë, por nuk e kundërshtoni me revoltë, nesër do t’i përcillni fëmijët tuaj me lot në sy – siç na përcollën neve – drejt emigrimit.
Drejt moskthimit.
Drejt diskriminimit.
Drejt asimilimit.
Për moskokëçarjen e sotme, për komoditetin që gëzoni, nesër do të paguani shumë shtrenjtë – jo me lekë, por me vetmi.
Dhe kjo është fatkeqësia më tronditëse që mund t’u ndodhë prindërve në jetë. Mosveprimi juaj sot do të dëmtojë fëmijët tuaj nesër dhe, në fund, edhe ju vetë.
Do ta braktisni këtë jetë fillikat – pa lamtumirë, pa mirënjohje, pa falënderime.
Ky do të jetë çmimi i rehatisë së sotme!
Fëmijët tuaj do të bëjnë dy javë pushim në vit, në vendin me dhjetë muaj verë, por një ditë ata nuk do të gjejnë më prindërit aty – do ta gjejnë shtëpinë bosh, do të gjejnë fqinj të huaj, që kanë blerë shtëpitë në vendin që televizioni ARTE në Gjermani e quajti parajsë.
Nga parajsa nuk iket!
Por një shtet i dominuar nga krimi dhe korrupsion bëhet ferr për vendasit dhe parajsë për të huajt.
Shteti i së drejtës nuk të falet nga askush!
Për ta ndërtuar, duhet revoltë!
Jo në media, por në rrugë.
Jo nesër, por tani!
Nëse jo, mësoja fëmijës gjuhën e huaj që në kopsht, për vendin ku do ta syrgjynosësh.
Do të diskriminohet më pak, ndoshta.
A e ke fjalën për “Shteti i së drejtës ISLAMIKE” ?