Nga Isuf Bajraktari
Ai nuk flet shumë, por punon shumë. Me integritet, dije dhe përkushtim, Visar Azemi po e rikthen besimin e qytetarëve në politikën lokale dhe po i jep Ferizajt një drejtim të ri.
Në një kohë kur politika shpesh shihet me mosbesim, Visar Azemi ka zgjedhur një rrugë tjetër: të udhëheqë me shembull, punë dhe karakter.
Që nga dita kur mori drejtimin e Lidhjes Demokratike të Kosovës në Ferizaj, ai ka ndryshuar mënyrën se si funksionon kjo degë.
Nga një strukturë e lodhur, sot LDK e Ferizajt është model i organizimit dhe bashkëpunimit qytetar.
Me tri vite në krye të saj, Azemi ka rikthyer energjinë, përfshirjen dhe besimin – duke dëshmuar se udhëheqja me vlera mbetet e mundur edhe në realitetin politik të sotëm.
Nga shoqëria civile në politikë
Para përfshirjes në LDK, Visar Azemi ka qenë Drejtor Ekzekutiv i Balkan Green Foundation, ku ka bashkëpunuar me Komisionin Evropian, Agjencitë Gjermane të Zhvillimit dhe Rockefeller Brothers Fund në projekte për energjinë e gjelbër dhe zhvillimin e qëndrueshëm.
Ai është Inxhinier i diplomuar në Sistemet Elektroenergjetike nga Universiteti i Prishtinës dhe mban Master në Menaxhim Financiar Ndërkombëtar nga University of Maryland Global Campus, ku gjithashtu ka ligjëruar për Algjebër dhe Shkenca Kompjuterike për ushtrinë amerikane.
Ky kombinim i dijes teknike dhe përvojës ndërkombëtare e ka bërë Azemin një udhëheqës modern, me qasje profesionale ndaj çdo sfide.
Rrënjë të forta dhe përkushtim qytetar
Visar Azemi vjen nga një familje e njohur intelektuale e Ferizajt, me traditë të gjatë në arsim, kulturë dhe shërbim publik.
Kjo trashëgimi e ka formuar si njeri të përulur, të urtë dhe të ndershëm – cilësi që i ka ruajtur edhe në politikë.
Në çdo takim, ai mbetet afër qytetarëve: dëgjon, kupton dhe vepron.
“Ferizaji ka zemër të madhe. Me drejtim të duhur, mund të bëhet qytet i jetueshëm për të gjithë,” – thotë shpesh ai.
Shembull i një politike që bashkon
Sot, Visar Azemi shihet si figura që po e rikthen besimin e qytetarëve në politikën lokale.
Ai është shembull i një gjenerate të re udhëheqësish që nuk kërkojnë pushtet, por shërbim.
Me integritet, dije dhe maturi, ai po ndërton një LDK të fortë dhe një Ferizaj me vizion.
Fatkeqesisht Ferizaj nuk ka nje kandidat qe e meriton kandidimin per kryetar te Ferizajt. Visar Azemi ne zgjedhjet e fundit parlamentare nuk arriti te fitoje mandatin e deputetit. Prandaj z. Abdixhiku gaboi kur e nominoi per kryetar te Ferizajt. Si humbes qe ishte Visari nuk do te duhej te shperblehej nga kryetari i LDK-së. Edhe kete here Visari e ka te garantuar humbjen.