Një gjest domethënës i Kelmend Ahmetajt nga Vuthajt ka tërhequr vëmendjen në pikën kufitare “Bashkimi”, në Vermosh–Guci, ku është vendosur një barrierë e re elektrike, falë donacionit të tij.
Këtë veprim fisnik e ka bërë të ditur Naser Vuçetaj, i cili, gjatë kthimit të tij përmes kësaj pike kufitare, ka vërejtur ndryshimin dhe ka ndarë me publikun një përjetim të veçantë.
Në rrëfimin e tij, Vuçetaj shkruan:
“Sonte, gjatë kthimit, në pikën kufitare ‘Bashkimi’, në Vermosh–Guci, më ra në sy barriera e re elektrike, e cila i ka dhënë një pamje më të rregullt kësaj pike kufitare.
Nga kureshtja, pyeta një nga policët kufitarë se kur ishte vendosur. Përgjigjja e tij më befasoi dhe, njëkohësisht, më bëri të ndiej një krenari të veçantë:
‘Është donacion i Kelmend Ahmetajt nga Vuthajt.’
Nuk është vetëm një barrierë elektrike. Është një gjest i vogël në dukje, por i madh në kuptim.
Vepra të tilla janë shembulli më i bukur se si dashuria për vendlindjen mund të shprehet jo vetëm me fjalë, por edhe me vepra.”
Një shembull i dashurisë për vendlindjen
Ky donacion dëshmon se kontributi për atdheun nuk matet vetëm me madhësinë e investimit, por edhe me vullnetin dhe përkushtimin për të bërë diçka të dobishme për komunitetin.
Pika kufitare Vermosh–Guci ka një rëndësi të veçantë për banorët e Kelmendit, Plavës e Gucisë, si dhe për të gjithë ata që udhëtojnë ndërmjet dy anëve të kufirit.
Gjesti i Kelmend Ahmetajt nga Vuthajt është një shembull pozitiv i përgjegjësisë qytetare dhe i dashurisë për vendlindjen dhe kombit si tërësi.
Sepse atdhedashuria nuk dëshmohet vetëm me fjalë të bukura, por mbi të gjitha me vepra konkrete.
Burimi: Naser Vuçetaj
https://plavaeguciasot.com/gjesti-fisnik-i-kelmend…/
