Sipas raportimeve të mediave izraelite, informacionet e mbledhura nga shërbimet izraelite kanë kontribuar në identifikimin e kërcënimit dhe në zbulimin e planit për eliminimin e shtetasit izraelit.
Në qendër të organizimit dyshohet se qëndronte shtetasi iranian Edris Jahangiri Mavaneh, i cili, sipas autoriteteve të Maqedonisë së Veriut, kishte lidhje me shërbimet iraniane të sigurisë dhe inteligjencës.
Për realizimin e atentatit dyshohet se ishte angazhuar edhe Naji Sharifi Zindashti, një person i kërkuar nga FBI-ja, i cili akuzohet se kishte ndihmuar në rekrutimin e personave nga Shkupi dhe Kumanova për të kryer sulmin.
Operacioni u zhvillua në bashkëpunim mes shërbimeve greke dhe atyre të Maqedonisë së Veriut. Në kuadër të tij janë arrestuar pesë persona, një në Greqi dhe katër në Maqedoninë e Veriut, shqiptarë të RMV, ndërsa një tjetër i dyshuar vijon të kërkohet.
Gjatë kontrolleve, autoritetet kanë sekuestruar armë, municione, telefona, kompjuterë, USB, shënime me të dhëna kontakti dhe skica që shënonin vendndodhje të caktuara.
Hetimet kanë zbuluar gjithashtu se disa prej të dyshuarve kishin udhëtuar drejt Iranit dhe vendeve të tjera, ku dyshohet se kishin zhvilluar takime me personin që koordinonte planin. Sipas autoriteteve të Maqedonisë së Veriut, hetimi kishte nisur që në fillim të vitit 2026 dhe ishte zhvilluar në bashkëpunim me shërbimet greke dhe partnerë të tjerë ndërkombëtarë.
Ndërkohë, pretendimet për përfshirjen e shërbimeve iraniane në organizimin e atentatit mbeten pjesë e hetimeve. /Top Channel
____
Tronditje në rajon: 6 persona nga Shkupi dhe Kumanova dyshohen për planifikimin e vrasjes së një biznesmeni izraelit në Greqi!
Një operacion ndërkombëtar i sigurisë ka zbuluar një komplot të dyshuar për vrasjen e një biznesmeni izraelit me origjinë greke, ku dyshohet se ishin përfshirë gjashtë persona nga Shkupi dhe Kumanova, të moshës 29 deri në 73 vjeç.
Sipas gazetës greke Protothema, personi që ishte shënjestruar mbante pozitë drejtuese në një kompani dhe ishte në interes të shërbimeve iraniane të inteligjencës. Ai ndodhej nën mbrojtje policore për shkak të kërcënimeve të mëparshme.
Hetimet dyshojnë se operacioni ishte organizuar nga shtetasi iranian Edris Jahangiri Mavane, me ndihmën e Naxhi Sharifi Zindashtit, person i kërkuar nga FBI-ja.
Të dyshuarit nga Maqedonia e Veriut, sipas raportimeve, kishin zhvilluar takime me organizatorët në Iran dhe vende të tjera, ndërsa detyra e tyre ishte të udhëtonin drejt Greqisë për të realizuar atentatin.
Gjatë aksionit policor janë sekuestruar armë, municion, telefona, kompjuterë dhe skica të lokacioneve të rëndësishme. Katër persona ndodhen në paraburgim, një në arrest shtëpiak, ndërsa i gjashti është ende në kërkim.
Operacioni është realizuar në bashkëpunim ndërmjet shërbimeve të sigurisë së Maqedonisë së Veriut dhe Greqisë, duke parandaluar atentatin e dyshuar.
Hetimet vazhdojnë për zbardhjen e plotë të rrjetit dhe lidhjeve të tij ndërkombëtare.



