Presidentja e Republikës së Kosovës, Vjosa Osmani priti sot në takim një delegacion nga Parlamenti Federal i Mbretërisë së Belgjikës në Asamblenë Parlamentare të NATO-s, të kryesuar nga Theo Francken. 
 
Presidentja Osmani falënderoi për mbështetjen dhe përkushtimin e Belgjikës në misionin e NATO-s dhe partneritetin e saj me Kosovën. 
 
Në këtë kontekst, Presidentja Osmani ka potencuar se synimi i Kosovës është që anëtarësimi në Partneritetin për Paqe t`i paraprijë atij në NATO dhe se këta hapa kontribuojnë në stabilitetin jo vetëm të Kosovës, por edhe rajonit. 

 
Sipas Presidentes Osmani, Kosova është e përkushtuar në përmbushjen e obligimeve të saj si partnere në promovimin e sigurisë dhe stabilitetit rajonal. 
 
Një pjesë e takimit iu kushtuar edhe mundësive të bashkëpunimit ndërparlamentar dhe fusha të ndryshme me interes të përbashkët.    

Prishtinë, 14 korrik 2023

Kryeministri i Republikës së Kosovës, Albin Kurti, së bashku me zëvendësministrin e Punëve të Jashtme dhe Diasporës, Kreshnik Ahmeti dhe deputetin, njëherësh Udhëheqësin e Delegacionit të Kuvendit të Republikës së Kosovës në Asamblenë Parlamentare të NATO-s, Driton Hyseni priti në takim një delegacionin përfaqësues të Parlamentit Federal të Belgjikës në Asamblenë Parlamentare të NATO-s, të kryesuar nga deputeti Theo Francken.

Temat që u diskutuan në këtë takim ishin prezenca e delegacionit të Kuvendit të Republikës sonë në Asamblenë e NATOs-s, bashkëpunimi bilateral ndërmjet institucioneve të Republikës së Kosovës dhe Belgjikës dhe mundësitë e thellimit të bashkëpunimit në fushën e mbrojtjes. Deputetët belg konfirmuan mbështetjen e Belgjikës ndaj Kosovës sidomos në proceset integruese në mekanizmat e BE-së dhe NATO-s.

Kryeministri Kurti falënderoi delegacionin belg për vizitën dhe mbështetjen e tyre dhënë Kosovës dhe të shtetit belg që në vazhdimësi ka përkrahur vendin dhe shtetin tonë në gjitha fazat e shtetndërtimin dhe zhvillimit.

Ai i njoftoi ata me punën e institucioneve, arritjet e qeverisjes, përparimin demokratik, ekonomik dhe në sundim të ligjit, si dhe vëmendjen që qeveria i ka dhënë fushës së mbrojtjes dhe mekanizmave të sigurisë përmes ndarjeve buxhetore në dy vitet e fundit.

Në takim gjithashtu u diskutua edhe për zhvillimet e fundit në vend, veçanërisht në katër komunat në veri dhe për dakordimin e arritur në fillim të kësaj javë për hapat drejt depërshkallëzimit të plotë të situatës atje.

Prishtinë, 14 korrik 2023

‘Do të jeni pjesë e historisë së vendit tonë dhe përpjekjeve të përbashkëta për ta ngritur dhe forcuar Republikën

“Policia e Kosovës vazhdon të jetë një ndër institucionet më të besueshme për qytetarët tanë. Vazhdon të zbatojë me sukses misionin kushtetues që të mbrojë jetën dhe pronën e qytetarëve, të mbajë rendin dhe qetësinë publike, të parandalojë dhe zbulojë krimin, të mbrojë të drejtat dhe liritë e njeriut, e të trajtojë në mënyrë të barabartë të gjithë qytetarët pa dallim etnie, religjioni, gjinie a moshe”. Kështu tha Kryeministri i Republikës së Kosovës, Albin Kurti, në ceremoninë e diplomimit të Gjeneratës së 58-të të Policisë së Kosovës. 

Para të pranishmeve të shumtë, përfaqësues të institucioneve e familjarë të policëve të sapodiplomuar, kryeministri tha se është i lumtur që ndodhet në këtë ngjarje të rëndësishme për Policinë e Kosovës, në të cilën diplomuan 418 kadetëve, në përbërje gati të të gjitha komuniteteve që jetojnë në Republikën tonë. 

Ai tha se që nga marrja e mandatit të Qeverisë, janë zotuar për luftë të pakompromis ndaj korrupsionit, veçanërisht atij që është mirëmbajtur me vite në institucionet tona, për luftim ndaj çdo lloj krimi të organizuar, që mbi të gjitha ka rënduar mirëqenien e qytetarëve tanë. “Për ruajtje të sovranitetit dhe integritetit territorial të Republikës sonë. Policia jonë, për këto dy vite, ka qenë maksimalisht e angazhuar në realizimin e këtyre prioriteteve të përbashkëta”, u shpreh kryeministri Kurti. 

“Intensiteti i njëjtë i punës së zyrtarëve tanë policorë ka vijuar edhe në veriun e vendit tonë, që në të kaluarën ka qenë zonë e rehatisë për bandat kriminale të udhëhequra nga Beogradi. Pikërisht për shkak të këtij aktiviteti të shtuar policor edhe në atë zonë, ka pasur sulme të njëpasnjëshme ndaj zyrtarëve tanë policorë, nga të cilat 25 zyrtarë janë lënduar lehtë, një është plagosur, ndërsa një ndodhet aktualisht në tretman mjekësor pas lëndimit që kishte marrë në aksionin e arrestimit të kriminelit famëkeq “Llune”, u shpreh ai. 

Të gjitha këto rezultate e sakrifica në garantim të sundimit të rendit dhe të ligjit, siç tha kryeministri, janë dëshmi se detyra e policit kërkon përkushtim në detyrë, konsistencë në veprim dhe bindje të pakompromis në respektim të ligjshmërisë. 

Duke iu drejtuar kadetëve policorë, kryeministri Kurti tha se nga sot filloni një epokë të rëndësishme për veten tuaj e për vendin tonë. “Ju pret një rrugë e gjatë, me sfida dhe sakrifica para vetes, por asnjëra prej tyre nuk duhet të zbehë vullnetin dhe misionin tuaj për të shërbyer. Policia jonë, së cilës ju keni bashkuar, është vijimësi e Ushtrisë sonë Çlirimtare. Liria jonë ka ardhur pas sakrificave të brezave të tërë në përpjekjet për liri e çlirim nga okupatori serb. Si pjesëtarë të Policisë së Kosovës do të jeni pjesë e historisë së vendit tonë dhe përpjekjeve tona të përbashkëta për ta ngritur dhe për ta forcuar Republikën tonë”, ishin fjalët e kryeministri Kurti. 

Në këtë ceremoni, të pranishëm ishin edhe presidentja Vjosa Osmani Sadriu, zëvendëskryeministrja e Republikës së Kosovës për Çështje të Pakicave dhe të Drejta të Njeriut, Emilija Rexhepi, ministri i Punëve të Brendshme, Xhelal Sveçla, ministri i Mbrojtjes Armend Mehaj, drejtori i Përgjithshëm i Policisë, Gazmend Hoxha, ambasadorë dhe përfaqësues të misioneve diplomatike në vendin tonë dhe personalitete të tjera.

Fjala e plotë e kryeministrit Kurti: 

Shkëlqesia juaj, Vjosa Osmani Sadriu, Presidente e Republikës së Kosovës,

E nderuara zëvendëskryeministre, Emilija Rexhepi,

I nderuari ministër i Punëve të Brendshme, Xhelal Sveçla,

I nderuari ministër i Mbrojtjes, Armend Mehaj,

I nderuari Drejtor i Përgjithshëm i Policisë së Kosovës, Gazmend Hoxha,

Të nderuar ministra, zëvendësministra, deputetë të Republikës së Kosovës,

I nderuari Besim Kelmendi, ushtrues detyre i Kryeprokurorit të Shtetit,

Shkëlqesi ambasadorë dhe përfaqësues të misioneve diplomatike,

I nderuari komandat i KFOR-it, Angelo Ristuccia,

I nderuari zëvendëskomandant i Forcës së Sigurisë së Kosovës, Enver Cikaqi,

Të dashur kadetë policorë dhe ju familjarë të tyre të pranishëm këtu,

Të nderuar pjesëmarrës,  

Jam i nderuar dhe i lumtur që ndodhem sot këtu mes jush, në këtë ngjarje të rëndësishme për Policinë e Kosovës e për të gjithë neve, me rastin e diplomimit të 418 kadetëve, në përbërje gati të të gjitha komuniteteve të cilët jetojnë në Republikën tonë. 

Policia e Kosovës vazhdon të jetë një ndër institucionet më të besueshme për qytetarët tanë. Vazhdon të zbatojë me sukses misionin kushtetues që të mbrojë jetën dhe pronën e qytetarëve, të mbajë rendin dhe qetësinë publike, të parandalojë dhe ta zbulojë krimin, të mbrojë të drejtat dhe liritë e njeriut, e të trajtojë në mënyrë të barabartë të gjithë qytetarët pa dallim etnie, religjioni, gjinie a moshe.

Si Qeveri e Republikës së Kosovës, që nga marrja e mandatit, jemi zotuar për luftë të pakompromis ndaj korrupsionit, veçanërisht atij që është mirëmbajtur me vite në  institucione tona. Për luftim ndaj çdo lloj krimi të organizuar, që mbi të gjitha ka rënduar mirëqenien e qytetarëve tanë. Për ruajtje të sovranitetit dhe integritetit territorial të Republikës sonë. Policia jonë, për këto dy vite, ka qenë maksimalisht e angazhuar në realizimin e këtyre prioriteteve të përbashkëta. 

Rreth 900 operacione policore janë zhvilluar në tërë territorin e vendit tonë. Janë arrestuar mbi 3 mijë e 200 persona për vepra të ndryshme penale, si keqpërdorim të detyrës zyrtare, fajde, ryshfet, kanosje, dhunë, vrasje e deri te arrestimet për sulme ndaj rendit kushtetues e përfshirje në akte terroriste. 

Intensiteti i njëjtë i punës së zyrtarëve tanë policorë ka vijuar edhe në veriun e vendit tonë, që në të kaluarën ka qenë zonë e rehatisë për bandat kriminale të udhëhequra nga Beogradi. Pikërisht për shkak të këtij aktiviteti të shtuar policor edhe në atë zonë, ka pasur sulme të njëpasnjëshme ndaj zyrtarëve tanë policorë, nga të cilët 25 zyrtarë janë lënduar lehtë, një është plagosur, ndërsa një ndodhet aktualisht në tretman mjekësor pas lëndimit që kishte marrë në aksionin e arrestimit të kriminelit famëkeq “Llune”.

Të gjitha këto rezultate e sakrifica në garantim të sundimit të rendit dhe të ligjit, janë dëshmi se detyra e secilit polic kërkon përkushtim në detyrë, konsistencë në veprim dhe bindje të pakompromis në respektim të ligjshmërisë. 

Të dashur kadetë policorë, që nga sot filloni një epokë të rëndësishme për veten tuaj dhe për vendin tonë. 

Ju pret një rrugë e gjatë, me sfida dhe sakrifica para vetes, por asnjëra prej tyre nuk do ta zbehë vullnetin dhe misionin tuaj për të shërbyer. Policia jonë, së cilës ju keni bashkuar, është vijimësi e Ushtrisë sonë Çlirimtare. Liria jonë ka ardhur pas sakrificave të brezave të tërë në përpjekjet për liri e çlirim nga okupatori serb. Si pjesëtarë të Policisë së Kosovës do të jeni pjesë e historisë së vendit tonë dhe përpjekjeve tona të përbashkëta për ta ngritur dhe për ta forcuar Republikën tonë. 

Rezultatet e sukseset ndër vite të Policisë, vetëmohimi dhe puna e palodhshme e zyrtarëve policorë të 57 gjeneratave para jush, dhe policët e rënë në krye të detyrës, le të jenë udhërrëfyes i punës suaj të përditshme. Zyrtarët policorë që nuk kanë bërë kompromis me ligjin e nuk janë bërë pjesë e proceseve që mbi të gjitha kanë dëmtuar imazhin e kanë cenuar integritetin e Policisë, janë shembulli më i mirë për t’u ndjekur nga ju. 

Në mbështetje të parezervë keni një qeveri demokratike e bashkëpunuese, e cila asnjëherë nuk do të synojë të minojë rolin tuaj e që do të adresojë secilën sfidë që do të keni para vetes. Sfida juaj është sfida jonë. 

Ju uroj përzemërsisht suksese me rastin e diplomimit tuaj. Policia e Kosovës do të vazhdojë të mbetet në shërbim të të gjithë qytetarëve pa dallim dhe dyert e saj do të jenë gjithmonë të hapura për të gjithë ata që duan të jenë faktor i garantimit të sigurisë dhe të ligjshmërisë në vendin tonë.

Ju falënderoj për gatishmërinë dhe vendosmërinë, për vullnetin dhe synimin për t’i shërbyer ndershmërisht vendit tonë e qytetarëve tanë.

Ju falemnderit. 

Më shumë fotografi gjeni në linkun në vijim: 

https://kryeministri.rks-gov.net/blog/kryeministri-kurti-ne-diplomimin-e-gjenerates-se-58-te-te-policise-se-kosove-do-te-jeni-pjese-e-historise-se-vendit-tone-dhe-perpjekjeve-te-perbashketa-per-ta-ngritur-dhe-forcuar-republiken/

Kuvendi i Republikës së Kosovës, kryesuar nga kryeparlamentari Glauk Konjufca, mbajti seancën e radhës.

Gjatë kohës së deklarimeve jashtë rendit të ditës, për shkak të mopajtimeve dhe tensioneve ndërmjet pozitës, opozitës dhe kabinetit qeveritar, punimet e kësaj seance u ndërprenë për të vazhduar pas një pauze disa orëshe.

Seanca vazhdoi me fjalimin e kryeparlamentarit Glauk Konjufca, i cili iu drejtua deputetëve të Kuvendit të Kosovës, duke bërë thirrje për mos përsëritje të veprimeve, të cilat e dëmtojnë imazhin e institucioneve dhe demokracinë e vendit.

Duke theksuar se Kuvendi i Kosovës ka pasur imunitet të mirë në rezistencën ndaj përleshjeve fizike, imunitet ky i vlerësuar pozitivisht edhe nga bota demokratike, kryeparlamentari Konjufca potencoi se sjelljet e mëhershnme s’do t’ia dëshironte askujt, dhe se si të tilla do të gjykohen nga qytetarët e Republikës së Kosovës.

“Ne i kemi betejat tona, mosmarrëveshjet tona, ne i kemi papajtueshmëritë tona të thella, por ato mospajtime duhet t’i mbajmë në nivelin e funksionimit të domosdoshëm të institucioneve tona demokratike, të cilat monitorohen nga qytetarët e republikës sonë, por edhe nga bota”, tha kryetari Konjufca.

I pari i Kuvendit gjatë fjalimit të tij, bëri thirrje po ashtu që të merrët me qetësi puna e përbashkët që e bëjnë për Kosovën dhe të bëhen përpjekje për tejkalimin e kësaj dite të vështirë dhe këtyre momenteve të vështira për vendin.

Duke potencuar misionin fisnik që e shoqëron pozitën e deputetit, kryetari Konjufca, ftoi që të vazhdohet me pyetjet parlamentare dhe të vazhdohet me pika të tjera të rendit të ditës, ashtu siç presin qytetarët e Republikës së Kosovës.

Po ashtu, kryeparlamentari Konjufca kërkoi për hapje të një kapitull i ri pas veprimeve të papranueshme që ndodhën sot në Kuvend, duke tejkaluar situatën dhe duke mos u bërë përgjegjës në përballjen e situatave të paparashikura për vendin, në rast të mostejkalimit të situatës.

Por, meqë disponimi i grupeve parlamentare ishte që të deklarohen për situatën e krijuar në Kuvend, u vazhdua me qëndrimet e përfaqësuesve të partive politike parlamentare.

Si rrjedhojë, duke e falënderuar kryetarin Konjufca për fjalën e tij, në emër të Grupit Parlamentar të PDK-së u deklarua deputetja Eliza Hoxha.

Ajo pasi përshkroi situatën që ndodhi në Kuvend, ndër të tjera tha se ka dy pyetje lidhur me atë se a përfaqësohet kryeministri i Kosovës dhe pozita parlamentare nga deputetja Mimoza Kusari, në bisedat, të cilat i ka zhvilluar me Radoçiqin dhe Simiqin.

Ndërkaq, nga Grupi Parlamentar i LDK-së, fjalën e mori deputeti Arben Gashi, i cili duke iu referuar situatës së sotme të krijuar në Kuvend, tha se nuk ka pasur asnjë situatë tjetër sulmi në të kaluarën.

Deputeti Gashi kërkoi që punimet e kësaj seance të vazhdojnë në një ditë tjetër.

Tutje, në emër të Grupit Parlamentar të AAK-së, u deklarua deputeti Bekë Berisha, i cili tha se reagimet nga ngjarja e sotme kanë qenë të pahijshme për vendin.

Ai tha se përkundër asaj që ndodhi, duhet të bëhen përpjekje që me mirëkuptim të vazhdojë puna e Kuvendit.

Ndërkohë, Kuvendi mbajti seancë të jashtëzakonshme të thirrur nga 41 deputetë.

Mes tensioneve ndërmjet deputetëve të pozitës dhe opozitës, Kuvendi pas shmagies nga afatet procedurale, miratoi në lexim të dytë Projektligjin nr. 08/L-220 për Çmimin e Produkteve Medicinale, si dhe votoi për formimin e Organit Përzgjedhës të Pavarur për përzgjedhjen e anëtarit të Organit Shqyrtues të Prokurimit.

Pas përfundimit të seancës së jashtëzakonshme, Kuvendi vazhdoi punimet e seancës së rregullt me pikat tjera të rendit të ditës.

Në mungesë kuorumi nuk pati vendimmarrje për Projektligjin nr.08/L-212 për Shëndetin Riprodhues dhe Fertilizim të Asistuar Mjekësor dhe as për Projekligjin nr.08/L-207 për Tekstet Shkollore.

Po ashtu, në mungesë kuorumi u bartën për seancën e radhës pikat si në vijim: Votimi i Projektligjit nr.08/L-222 për ratifikimin e Marrëveshjes së kredisë në mes të Republikës së Kosovës dhe Bankës Evropiane për Rindërtim dhe Zhvillim për Projektin “Ngrohtorja Solare e Prishtinës”; Votimi i Projektligjit nr.08/L-223 për ratifikimin e Marrëveshjes për bashkëfinancimin e bursave të arsimit të lartë në nivelin master në mes Ministrisë së Arsimit, Shkencës, Teknologjisë dhe Inovacionit dhe Ambasadës së Francës në Prishtinë; Shqyrtimi i Projektligjit nr.08/L-234 për ratifikimin e Marrëveshjes së kredisë për programin e financave publike dhe rritjes ekonomike ndërmjet Republikës së Kosovës dhe Fondit OPEC për Zhvillim Ndërkombëtar; Shqyrtimi i Projektligjit nr.08/L-236 për ratifikimin e Traktatit ndërmjet Republikës së Kosovës dhe Mbretërisë së Danimarkës për shfrytëzimin e institucionit korrektues në Gjilan, me qëllim të ekzekutimit të dënimeve daneze;

Më pas, Kuvendi miratoi me 61 vota në shqyrtim të dytë këto projektligje: Projektligjin nr.08/L-102 për ndryshimin dhe plotësimin e Ligjit nr.04/L-139 për Procedurën Përmbarimore, i ndryshuar dhe plotësuar me Ligjin nr. 05/L-118; Projektligjin nr.08/L-199 për ndryshimin dhe plotësimin e Ligjit nr.05/L-060 për Mjekësinë Ligjore; Projektligjin nr.08/L-177 për Institutin e Krimeve të Kryera Gjatë Luftës në Kosovë; Projektligjin nr.08/L-191 për Ekspertët Gjyqësor; Projektligjin nr.08/L-142 për ndryshimin dhe plotësimin e ligjeve që përcaktojnë shumën e beneficionit në lartësi të pagës minimale, procedurat e caktimit të pagës minimale dhe shkallët tatimore në të ardhurat personale vjetore; Projektligjin nr.08/L-190 për Zhvillim Rajonal të Balancuar; Projektligjin nr.08/L-200 për Parandalimin dhe Kontrollin e Sëmundjeve Ngjitëse, si dhe Projektligjin nr.08/L-201 për ndryshimin dhe plotësimin e Ligjit nr. 05/L-081 për Energjinë.

Tutje, ministrja e Drejtësisë, Albulena Haxhiu, paraqiti dhe arsyetoi Projektligjin nr.08/L-227 për Përfaqësimin e Institucioneve Shtetërore në Procedura Gjyqësore dhe Arbitrazh, i cili më pas u miratua me shumicë votash.

Edhe Projektligji nr.08/L-237 për Kadastër të Pronës së Paluajtshme, i cili u prezantua dhe u arsyetua nga ministri Hajrullah Çeku, i deleguar nga ministri i linjës, u miratua me shumicë votash.

Në emër të Qeverisë, ministrja Artane Rizvanolli, paraqiti dhe prezantoi Projektligjin nr.08/L-238 për Fondin sovran të Republikës së Kosovës, duke theksuar se ky projektligj rregullon mënyrën e qeverisjes së fondit me pavarësi funksionale, operacionale dhe funksionale, si dhe vendos rregullat për menaxhimin e aseteve për investime dhe mënyrën e financimit të fondit. Ky projektligj u miratua me 61 vota.

Kuvendi në vazhdim e miratoi raportin me rekomandim për mbikëqyrjen e zbatimit të Ligjit nr. 06/L-009 për Ndërmjetësim, si dhe raportin me rekomandime për mbikëqyrjen e zbatimit të Ligjit nr.04/L-156 për Kontrollin e Duhanit dhe të Ligjit nr.08/L-040 për ndryshimin dhe plotësimin e Ligjit nr.04/L-156 për Kontrollin e Duhanit.

Kurse, në mungesë të grupeve parlamentare, formimi i Komisionit Ad-hoc për përzgjedhjen e 2 (dy) anëtarëve nga radhët e komunitetit shqiptar në Komisionin e Pavarur për Media, u bartë për seancën e radhës, sikurse edhe zgjedhja e Komisionerit Parlamentar për Forcën e Sigurisë së Kosovës

Tutje, Kuvendi mori vendim për emërimin e kryesuesit dhe të një (1) anëtari të Bordit të Agjencisë Kosovare të Privatizimit, si dhe zgjodhi dy anëtarë të Bordit të Zyrës së Rregullatorit të Energjisë dhe një (1) anëtar të Komisionit për Kërkesa Pronësore në Agjencinë Kosovare për Krahasim dhe Verifikim të Pronës.

Po ashtu, Kuvendi votoi për emërimin e kryesuesit dhe anëtarëve të Bordit Drejtues të Fondit të Kursimeve Pensionale të Kosovës, si dhe zgjodhi Ahmet Ismailin Guvernator të Bankës Qendrore të Republikës së Kosovës me 56 vota.

Në fund të kësaj seance, Kuvendi votoi për miratimin e Propozim – Vendimit të Qeverisë së Republikës së Kosovës për shkarkimin Kimete Gashit nga pozita e anëtares së Organit Shqyrtues të Prokurimit.

Prishtinë, 13 korrik 2023 

Kryeministri i Republikës së Kosovës, Albin Kurti, mirëpriti në kryeministri Kryetarin e ri të Këshillit Kombëtar Shqiptar në Serbi, Nevzad Lutfiun bashkë me Alban Alilin nga ky Këshill, i shoqëruar nga Këshilltarja Politike për Preshevë, Medvegjë dhe Bujanoc, Ardita Sinani.

Ai fillimisht e uroi për detyrën e re. Kryeministri Kurti tha se është interesuar për bashkëpunim të afërt dhe ofroi ndihmën e tij. U shpreh i lumtur që z. Lutfiu i takon një brezi të ri në politikë, duke bartë kështu idealizmin nga një gjeneratë në tjetrën.

Z. Lutfiu falënderoi kryeministrin për mikpritjen në këtë takim dhe për urimin, teksa i dha mbështetjen e plotë kryeministrin Kurti për qëndrimet e tij.

Në takim, ata folën për shqetësimet e shqiptarëve në Preshevë, Medvegjë dhe Bujanoc, diskriminimin sistematik që i bëhet atyre nga Qeveria e Serbisë, sidomos në fushën e arsimit dhe shëndetësisë, dhe për nevojat e të rinjve shqiptarë në këto komuna.

Kryeministri Kurti konfirmoi edhe një herë se mbështetja e Qeverisë së Kosovës për ta dhe Këshillin Kombëtar Shqiptar do të vazhdojë.

Prishtinë, 13 korrik 2023

Njoftim nga Prokuroria Themelore në Prishtinë 

Prokuroria Themelore në Prishtinë, njofton opinionin publik se Prokurori i Shtetit ka iniciuar hetime në drejtim të veprës penale “Sulmi”, sipas KPRK-së, lidhur me incidentin i cili ka ndodhur gjatë ditës së sotme në Kuvendin e Kosovës, si dhe ka autorizuar Policinë në ndërmarrjen e të gjitha veprimeve të nevojshme hetimore, përfshirë po ashtu marrjen e deklaratave të palëve të përfshira në këtë rast. 

Prokuroria në koordinim të plotë me Policinë e Kosovës, do t’i ndërmerre të gjitha veprimet konform dispozitave ligjore të KPPRK-së, deri në sqarimin e plotë të çështjes në fjalë.

Me respekt, 

Zyra për Komunikim Publik në ZKPSH 

Prokuroria Themelore Prishtinë