Gani I. Mehmeti 

Viola von Cramon, raportuesja për Kosovën në Parlamentin Evropian, shprehu shqetësimin e thellë për situatën aktuale në veri të Kosovës. Ajo theksoi se zgjedhja de jure nuk garanton automatikisht legjitimitet dhe qeverisje efektive. Cramon theksoi nevojën për shqyrtim të kujdesshëm të masave të ndërtimit të besimit, zgjidhjeve të zgjuara dhe strategjive të qëndrueshme për të nxitur besimin mes qytetarëve që jetojnë në veri të Kosovës. 

Zonja Cramon, nuk mendoj e as besoj se ju jeni më e shqetësuar se ne për gjendjen në veri të Kosovës! Por, ju i ndryshuat fjalët qysh para mbajtjes së zgjedhjeve, gjatë mbajtjes së zgjedhjeve dhe pas mbajtjes së zgjedhjeve, me çka i patët përkrahur zgjedhjet, madje duke i quajtur legjitime dhe të drejta.  Dhe, deri sa ju  i quajtët të drejta, serbët, në krye me Listën Serbe dhe me Vuçiqin, heshtën e nuk reaguan deri sot, kur po u jepni krahun. 

Se çfarë u bë tani që ndryshuat kursin, ju mund ta dini ! Tani, kur kryetarët e këtyre komunave deshën të shkojnë në zyret e tyre komunale, serbët u dolën përpara dhe ua prenë rrugën, duke i penguar të shkojnë në detyrat e tyre. E, deri sa të gjithë ju e keni gojën plot  për të drejtën për lëvizje të lirë, në këtë rast jeni kundër lëvizjes së lirë dhe në pengim për të ushtruar detyrat e veta kryetarët e këtyre komunave. Dhe shih, tani që ju sulmuat kryetarët e komunave, policinë e Kosovës, Qeverinë e Kosovës që i përkrahu kryetarët për të shkuar në vendet e tyre të punës, ju dolët kundër këtyr, ndërsa përkrahët destabilizuesit e rendit ligjor e kushtetues të Republikës së Kosovës.  

Tani, kjo për ne është edhe më shqetësuese se sa vetë ngjarjet që ndodhën, sepse nuk po ju kuptojmë se përse dilni në krah të atyre që pengojnë, që gjuajnë policinë e Kosovës, EULEX-in dhe civilët. 

Ju e dini se këto komuna kishin kryetarët e tyre, ata dhanë dorëheqje, pse nuk duan Republikën e Kosovës, në të cilën jetojnë e veprojnë! Ju e dini se, në objekte komunale e publike duhet të valojë flamuri i shtetit  që i përket. Ku jeni për këto plot 24 vite po bëhen që nuk i bindët serbët e Kosovës se ata jetojnë në Republikën e Kosovës ? Ku jeni ju që nuk ndërmerrni asgjë kundër tyre, nuk i vetëdijësoni, nuk ju tregoni, dhe më në fund, nuk i detyroni ! A më tregoni sesi do të ndaheshin shqiptarët në Serbi sikur të mos përdorin simbolet dhe flamujt e Serbisë nëpër objekte publike ? Përse keni dy kute – tjetër për serbët dhe tjetër për shqiptarët. 

Ose, nëse ju keni ndonjë qëndrim tjetër qoftë për veriun e Kosovës, qoftë për Kosovën, na tregoni.   

Sa i përket legjimitetit dhe qëndresës së kryetarëve të këtyre komunave, edhe ne jemi të vetëdijshëm, por lojën e luajnë ata që hyjnë në lojë, jo ata që shikojnë përanësh. Serbërt nuk deshën të hyjnë në lojë, nuk morën pjesë në zgjedhje, dhe faji e gabimi është i tyre. 

Sa u përket masave të ndërtimit të besimit, kurrë nuk do të ketë besim tek serbët, deri sa ata nuk e dinë e nuk e njohin për shtet të tyre Republikën e Kosovës. Deri atëherë, si mund të ndërtohet besimi. Besimi nuk mungon nga ana jonë, por nga ana e serbëve.  Dhe ky besim kurrë nuk do të ndërtohet tek ta, deri sa ju e leni pezull statusin e Kosovës e nuk u thoni serbëve të Kosovës se Kosova është shtet I pavarur. Ata juve ju dëgjojnë, bashkësinë ndërkombëtare, jo ne, pse pa ua thënë ju, ata nuk e marrin si realitet Shtetin e Ksoovës.  

Mbani mend kur në qershorin e viti 2022 kryetari i Gjermanisë i tha Vuçiqit në Beograd se Kosova është e pavarur? Vuçiqi ia ktheu se askush nuk ia kishte thënë deri atë ditë këtë? Pra, ata duan të dëgjojnë nga BE e SHBA, NATO e KFOR-I se Kosova është shtet. Ndryshe, ata shpresojnë se nuk është shtet dhe nuk duan ta pranojnë as serbët e Kosovës e të mos flasim përt Viuçiqin dhe Serbinë. 

Ti, zonja Cramon, dhe të gjithë tjerët që sulmuat Qeverinë e Kosovës, në këtë rast jeni gabim, jo pse unë dua, por pse është kështu.  Ju u trebët nga Vuçiqi i armatosur deri në dhëmbë më shumë se sa nga Rusia! Kjo është për t`u çuditur. 

Përndryshe, ne e dime se andej nga thoni ju , ndoshta u dashka të shkojmë, por jo gjithherë e keni mire, jo gjithherë e keni drejtë, jo gjithherë është ashtu. 

Përndryshe, nga përvoja  e kemi të ditur se, ata që pleqnojnë e ndajnë drejtësi, për të fjetur puna, e dëmtojnë të ligun ndërsa krahun i japin të fortit, sin ë rastin konkret që jeni ju.  

Por kjo nuk quhet drejtësi! 

Kjo quhet force, fuqi…! 

Dhe, lojën e luajnë ata që janë në lojë, jo spektatorët, siç janë serbët në këtë rast! Ata vetë dolën nga loja!

Florim Zeqa 

Me z. Faton Bislimi (ish deputet dhe zyrtarë i lartë i LDK-së) për herë të parë u takova në Deçan në fillim të Gushtit 2021, në takimet e mërgatës që organizohen për çdo vjet nga kryesia e SHHK “Salih Çekaj” në Zvicër me rastin e homazheve që i bëjnë heronjve dhe dëshmorëve të lirisë së Kosovës.

Dorëheqja e z. Faton Bislimi, këmbanë ogurzezë për LDK-në

Në mesin e kryesisë së shoqatës, anëtarësisë, mbështetësve të shoqatës, veprimtarëve dhe aktivistëve në mërgatë dhe personaliteteve të shquara vendore ishte edhe z. Faton Bislimi, me të cilin pata nderin dhe kënaqësinë të bëjë një rrugëtim të shkurtër në këmbë nga lokali afër sepermarketit “Viva Fresh” e deri tek shtatorja e kryeheroit Salih Çekaj, me ç’rast shkëmbyem mendime të frytshme rreth zhvillimeve politike në vend, me theks të veçantë në LDK.

Takimi i parë me z. Faton Bislimi më la përshtypje jashtëzakonisht pozitive, të një personaliteti të veçantë, idealist i pathyeshëm, njeri i sinqertë dhe shumë miqësor. Por, mbi të gjitha, atdhedashuria dhe përcaktimi i tij i vendosur në rrugën e filozofisë politike rugoviane më mbetën të skalitura në kujtesën time.

Pas përfundimit të homazheve ndodheshim në Restoranin TROFTA në Istog, me ç’rast z. Faton Bilsimi më dhuroj librin e tij të fundit për Kosovën në gjuhën angleze. Ishte kjo një surpizë dhe një dhuratë e çmuar e cila ma zbukurojë akoma më shumë atë ditë të bukur vere. Meqë Fatoni për shkak të obligimeve partiake u largua para kohe, u ndamë me të, me shpresën që të takohemi përseri në një takim privat.

Puna dhe angazhimi politik i Faton Bislimit është i njohur mirë për elektoratin e LDK-së, qoftë si pjesë e strukturave udhëheqëse të LDK-së, si deputet në Parlamentin e Kosovës, ashtu edhe për angazhimet dhe veprimtarinë e tij të gjatë dhe të suksesshme në SHBA, si personalitet i urtë dhe unifikues i LDK-së.

Dorëheqja e z. Faton Bislimi është këmbanë ogurzezë për LDK-në. E tillë është dorëheqja e një intelektuali të kalibrit nga një parti politike.

Zgjedhjet pa reforma, nuk sjellin ndryshim

Nisja e procesit zgjedhor brenda partiak në LDK pa reforma reale dhe substanciale, me injorimin dhe anashkalimin e figurave markante nuk janë ogur i mirë për LDK-në!

Reformimi i partisë dhe kthimi i besimit në elektorat bëhet duke i ofruar rreth vetës figurat themeltare, aktivistët dhe veprimtarët e devotshëm të LDK-së, duke iu dhënë hapësirë veprimi aktivistëve dhe veprimtarëve që e mbajtën mbi supet e tyre barrën e organizimit të aktiviteteve të LDK-së në këto 33 vitet e fundit, të cilët edhe në kohët më të vështira i qëndruan besnik amanetit të tri shkronjave të arta “LDK”. Ndryshe, çdo ikje nga vlerat dhe amaneti i figurave themeltare e dëmton imazhin e LDK-së.

Reformimi dhe konsolidimi i partisë, nënkupton hapje rrugë të ndryshimeve reale dhe substanciale, do të thotë hapje rrugë atyre që e kanë dijen, vullnetin dhe guximin për ta kthyer besimin e elektoratit në subjektin e traditës demokratike, për ta kthyer LDK-në rugoviane një herë e përgjithmonë kah vlerat e saj themeltare.

Vetëm mundësia e shprehjes së lirë e vullnetit të elektoratit dhe reformimi i thellë nëpër aktive, nëndegë dhe degë do të garantonte kushtet për krijimin e një bazamenti të shëndoshë dhe qëndruseshëm, të pastër dhe prospeures për LDK-në, për të qenë e gatshme të dali në ballafaqim me elektoratin në zgjedhjet e ardhshme parlamentare, të rregullta apo të jashtëzakonshme qofshin ato.

Ka ardhur momenti i fundit që LDK-ja të reformohet dhe freskohet me kuadro të reja, të përgaditura dhe të specializuara, me veprimtar të orëve të para të LDK-së si në Kosovë dhe gjithë andej vendeve evro-perëndimore, të cilët janë të gatshëm në mënyrë vullnetare të  kontribuojnë edhe një herë për të mirën e vendit sikurse në vitet e ’90-ta, pa asnjë kompensim material, pa asnjë ambicie pushteti apo privilegji shtetëror, për t’ju treguar dezertorëve dhe mercenarëve, mashtruesve dhe matrapazëve, karrieristëve dhe lakmitarëve të pushtetit sesi punohet për shtet dhe atdhe pa llogaritur në poste dhe privilegje personale.

LDK-ja rugoviane dhe Rugova për shqiptarët janë dy simbole të shenjta të historisë më të Re të Kosovës, do të mbetën të papërseritshme, të paharruara dhe të pashlyerara në kujtesën historike të brezave.

LDK-ja rugoviane është vlerë dhe pasuri kombëtare, është vetë historia dhe gurthemeli i shtetit të Kosovës. Andaj, mbrojtja e kësaj vlere kombëtare është obligim i secilit prej nesh, qoftë ai anëtarë apo mbështetës i filozofisë politike rugoviane.