–Menjëherë pas mbledhjes së Qeverisë, u njoftua aplikimi i Kosovës për anëtarsim në Këshillin e Evropës, në një deklaratë nga Strasburgu – Franca, të Zëvendëskryeministres dhe Ministres së Punëve të Jashtme e Diasporës Donika Gërvalla/
Nga Behlul Jashari, korrespondent i Drinit nga Prishtina
PRISHTINË, 12 Maj 2022/ Kosova nisë hapat zyrtarë drejt anëtarësimit në Këshillin e Evropës.
Sot, Qeveria e Republikës së Kosovës, e drejtuar nga Kryeministri Albin Kurti, ka zhvilluar mbledhje elektronike, të 77-tën, në të cilën ka miratuar në parim Nismën për anëtarësimin e Republikës së Kosovës në organizatën ndërkombëtare “Këshilli i Evropës – Council of Europe”.
Këshilli i Evropës është organizata më e vjetër ndërqeveritare në Evropë që për qëllim kryesor ka sigurimin e bashkëpunimit dhe unitetit ndërmjet anëtarëve të saj në lëminë e mbrojtjes së të drejtave të njeriut, demokracisë dhe sundimit të ligjit. Të drejtat e njeriut dhe liritë elementare janë të garantuara me Kushtetutën e Republikës së Kosovës, e cila ka ngërthyer në vete edhe konventat e Këshillit të Evropës, duke përfshirë Deklaratën e Përgjithshme të të Drejtave të Njeriut dhe Konventës Evropiane për Mbrojtjen e të Drejtave të Njeriut dhe Lirive Elementare dhe Protokollet e saj.
Vendimi i miratuar sot obligon Ministrinë e Punëve të Jashtme dhe të Diasporës që të zhvillojë të gjitha procedurat për anëtarësim në bazë të legjislacionit në fuqi.
Menjëherë pas mbledhjes së Qeverisë, u njoftua aplikimi i Kosovës për anëtarsim në Këshillin e Evropës, në një deklaratë nga Strasburgu – Franca, të Zëvendëskryeministres dhe Ministres së Punëve të Jashtme e Diasporës Donika Gërvalla.
“Sapo dolëm nga takimi me Zëvendës Sekretarin e Përgjithshëm të Këshillit të Evropës. Në emër të Republikës së Kosovës dorëzuam kërkesën për anëtarim në Këshill të Evropës”, tha ajo.
Pas këtij njoftimi, Zëvendëskryeministrja e Ministrja e Punëve të Jashtme dhe Diasporës Donika Gërvalla theksoi:
“Sot hapet një kapitull i ri për Kosovën në Këshillin e Evropës. Sot fillon procedura e shqyrtimit të kërkesës sonë e cila do të kalojë nëpër instanca të ndryshme të Këshillit të Evropës, të Asamblesë Parlamentare dhe në fund edhe të Këshillit Ministror. Kosova është vendi më demokratik në rajon. Kosova është vendi më proevropian në rajon. Dhe Kosova është vendi më optimist në rajon. Prandaj, Kosova e meriton të jetë anëtare e Këshillit të Evropës një ditë e më parë. Dhe kjo procedure, të cilën e kemi nisur sot, do të përfundojë me anëtarësimin e plotë të Kosovës në Këshill të Evropës dhe me këtë me forcim të të drejtave të qytetarëve të Republikës së Kosovës dhe qasjes së tyre në instanca evropiane”.
