Adem Lushaj, Deçan
Vizitat në konsullatat e Kosovës në Evropë në funksion të ndërkombëtarizimit të së vërtetës historike
Pas vizitave në Konsullatën e Republikës së Kosovës në Strasburg dhe në Konsullatën e Përgjithshme në Cyrih, gjatë qëndrimit tim në Gjermani pata kënaqësinë të vizitoj edhe Konsullatën e Përgjithshme të Republikës së Kosovës në Shtutgart, ku u prita nga Konsulli i Përgjithshëm, z. Hamdi Bërbatovci, dhe kolegu i tij, z. Gramoz Berisha.
Gjatë takimit bashkëbiseduam për çështje me interes kombëtar, rëndësinë e ruajtjes së kujtesës historike dhe domosdoshmërinë e dokumentimit e të ndërkombëtarizimit të krimeve të kryera gjatë luftës në Kosovë.
Me këtë rast, Konsullatës ia dhurova librin tim „Krimet serbe në Kosovë – Rasti i Deçanit“, në disa gjuhë. Përmes këtij botimi, të mbështetur në qindra dëshmi të viktimave dhe të mbijetuarve, synoj të kontribuoj në dokumentimin e së vërtetës historike dhe në njohjen ndërkombëtare të krimeve të kryera në Kosovë.
I vlerësoj mikpritjen dhe gatishmërinë për bashkëbisedim të përfaqësuesve të Konsullatës, duke besuar se bashkëpunimi ndërmjet institucioneve tona diplomatike dhe autorëve që dokumentojnë historinë është i rëndësishëm për ruajtjen e kujtesës kolektive dhe përcjelljen e së vërtetës te brezat e ardhshëm.
Kujtesa historike është përgjegjësi ndaj së kaluarës, detyrim ndaj së vërtetës dhe amanet për brezat që vijnë.
