Qendra “Gjenocidi në Kosovë – plagë e hapur” e udhëhequr nga atdhetari e shkrimtari i njohur Bardhyl Mahmuti, mbështeti idenë e Adnan Asllanit, që lulëkuqja të jetë simbol i viktimave të gjenocidit në Kosovë.
Kërkesë që Lulëkuqja me katër petale të bëhet simbol unik përkujtimor i gjenocidit në Kosovë është një veprim i duhur që duhet pranuar sa më parë nga institucionet dhe partitë politike të Kosovës. Megjithëse kërkesa si e tillë ndërlidhet vetëm me gjenocidin që e ka ushtruar Serbia në Kosovë në luftën e viteve 1998/1999, redaksia e Drinit është e mendimit që kërkesa e tillë e logjikshme dhe historikisht kaq domethënëse në të ardhmen nuk duhet ndërlidhur vetëm me gjenocidin e Serbisë ndaj Kosovës, por me gjenocidet që pushtues të ndryshëm, pra edhe serbët nga viti 1912, i kanë ushtruar ndaj shqiptarëve.
Qendra “Gjenocidi në Kosovë – plagë e hapur” në arsyetimin e saj thekson se “lulëkuqja, me ngjyrën e saj të gjakut, është simbol i përkujtimit të luftëtarëve të rënë në fushëbeteja”, duke i marrë shembujt e shteve të ndryshme që e përdorin simboliken e qartë të kësaj luleje. Edhe në Kosovë ekzistojnë rrëfime që ndërlidhen me simboliken e Lulëkuqes, që nga Beteja e Fushë – Kosovës, “kur gadishulli i madh u gdhi Europë dhe u ngrysë Azi” (Kadare) , ndërmjet koalicionit të asaj pjese të botës dhe Perandorisë Osmane, ushtrinë pushtuese të së cilës e udhëhoqi vet Sulltan Murati, tyrbes së të cilit sot në Mazgit të Obiliqit i falet edhe kreu i komunitetit mysliman të Kosovës!
Aq shumë gjaku është derdhur nga lufta e mbrojtësve të Gadishullit Ilirik me ushtrinë pushtuese osmane në betejën e Fushë – Kosovës, sa që, sipas legjendës, “nga gjaku i derdhur kanë mbirë lulëkuqet”, qysh tregohet pastaj në rrëfimet dhe këngët legjendare shekullore për betejën.
Prandaj, Redaksia e Drinit kërkon nga Bardhyl Mahmuti dhe Adnan Asllani e të tjerët që kësaj ideje t’ia japin kuptimin e plotë duke e plotësuar në aspektin kuptimor-historik, pasi dihet se përpos serbëve që kanë kryer gjenocide të shumëta ndaj shqiptarëve, janë edhe turqit-osmanli, grekët etj.
Redaksia e Drinit e përkrah plotësisht idenë e aktivistit të njohur të çështjes kombëtare dhe shkrimtarit Bardhyl Mahmuti dhe të Adnan Asllanit nga Qendra “Gjenocidi në Kosovë – Plagë e hapur”, duke shpresuar që kërkesa e tillë kaq e natyrshme (por pak e vonuar në kohë) të plotësohet ndërkohë, duke ia dhënë kuptimin e mirëfilltë që e meriton kjo simbolikë, pasi që gjenocide ndaj shqiptarëve kanë ndodhur në periudha të ndryshme të historisë sonë ndër shekuj.
Me respekt:
Redaksia e Drinit
