Nga: Zeqir Bekolli
Në Drenas, po bëhen më shumë se dy muaj qyshkur është mbyllur Zyra e Pensionistëve. Deri para dy ditësh, kur shumë zyre simotra ishin bosh në orar të punës, në derë ekzistonte mbishkrimi: Kjo zyrë është mbyllur përkohësisht!!!
Ndërsa, sot, ditën e premte, në derën e kësaj zyreje kishte ndërruar njoftimi. Në vend të atij paraprak shkruante: Punoj çdo të premte nga ora 9 deri në ora 12! Se kush ishte autori, nuk shkruante, por më la përshtypje shkrimi në vetën e parë dhe domethënia e tij, që të krijon përshtypjen se dikush e ka uzurpuar apo privatizuar zyrën dhe tash ia bën si don vet. E mbyll, e hap, madje edhe ia cakton vetës vetëm 3 orë pune në javë!
Unë kam një përvojë afro 18 vjeçare në institucionet e nivelit qendror, por asnjëherë nuk më rastësisi të përjetojë e shoh diçka të tillë. Apo ndoshta reformat në administratë paskan evoluar deri në atë shkallë, saqë të mos ketë nevojë të punohet më shumë se 3 orë, në një institucion të shtetit tejet të ndjeshëm, apo kjo është risi meqë shumica e pensionistëve kanë mbetur me nga 100 euro dhe kjo u mjafton zyrtarëve, që punën me ata ta kryejnë për tri orë! Apo ndoshta Administrata e Kosovës ka futur në funksion Inteligjencën
Artificiale dhe për njeriun ka mbetur fare pak punë.
Diçka po ndodhë me këtë zyre, por pse pikërisht kështu e dinë qeveritarët të nivelit lokal dhe qendror.
