Mitrovicë e veriut, 12 qershor 2025
Në objektin e Ministrisë së Administrimit të Pushtetit Lokal në Mitrovicë të veriut sot u mbajt takimi i parë i Bordit të Përbashkët të Mitrovicës me përfaqësues dhe anëtarë nga Komuna e Mitrovicës së jugut dhe Komuna e Mitrovicës së veriut.
Në këtë takim të parë, i cili u kryesua nga ministri në detyrë i Administrimit të Pushtetit Lokal, Elbert Krasniqi, njëherësh përfaqësues i kryeministrit, i pranishëm ishte edhe Kryeministri në detyrë i Republikës së Kosovës, Albin Kurti.
Kryeministri tha se është kënaqësi dhe nder për të që jetë aty me rastin e formalizimit të një të detyre të rëndësishme siç është Bordi i Përbashkët. Ai falënderoi Kryetarin e Komunës së Mitrovicës së jugut, Bedri Hamza dhe Kryetarin e Mitrovicës së veriut, Erden Atiq për propozimet e tyre për anëtarë të këtij Bordi. Anëtarët, kryeministri Kurti i uroi për detyrën e re dhe u dëshiroi shumë suksese dhe punë të mbara e të mira, teksa u zotua për mbështetje të plotë përballë sfidave që mund të kenë.
Bordi i Përbashkët Funksional ka një rëndësi të veçantë për bashkëpunimin e ngushtë ndërmjet dy komunave. Ai parashihet në Ligjin për Kufijtë Administrativ të Komunave.
Përmes bashkërendimit në fusha kyçe si infrastruktura, mjedisi, zhvillimi ekonomik dhe shërbimet komunale, ky Bord do të ofrojë një mekanizëm konkret për realizimin e projekteve të përbashkëta dhe ndërtimin e besimit reciprok.
Me pjesëmarrje të barabartë nga të dy komunat dhe nën kryesimin e përfaqësuesit të Kryeministrit, ky bashkëpunim është dëshmi e përkushtimit ndaj interesit të të gjithë qytetarëve, pa asnjë dallim.
