Kosova nuk është shtet musliman – është republikë e qytetarëve.
Reagim i domosdoshëm ndaj zërave fanatikë që sulmuan presidenten e Kosovës, Vjosa Osmani, për një gjest krejt normal: pirjen e ujit gjatë një konference.
Ajo pyetje – “A e dini se përfaqësoni një shtet mysliman?” – nuk është vetëm një provokim banal. Është shfaqje e qartë e mentalitetit radikal që kërkon ta shtyjë Kosovën drejt një identiteti fetar dhe jo qytetar.
Por ata nuk kuptojnë një gjë themelore: presidentja e Kosovës ka detyrë kushtetuese të mbrojë Kushtetutën dhe, në këtë rast, edhe karakterin laik të shtetit. Ky detyrim ekziston pikërisht për të mbrojtur qytetarët dhe shtetin nga imponimi i dogmave fetare mbi jetën publike.
Prandaj presidentja nuk ofendoi askënd. Përkundrazi, ajo nderoi veten, institucionin që përfaqëson dhe kombin. Muaji i shenjtë për myslimanët, Ramadan, është çështje besimi për besimtarët, por nuk mund të shndërrohet në muaj të shenjtë për shtetin apo për kombin.
Populli shqiptar e ka përcaktuar prej kohësh një parim të qartë: shoqëria duhet të jetë e lirë dhe demokratike, ku qeveriset nga udhëheqës të zgjedhur nga populli.
Në një republikë demokratike, udhëheqësit i zgjedh qytetari, jo besimtari.
