Prof. Dr. Sabri Tahiri, Gjilan
Kosova po kalon një nga periudhat më të vështira të jetës së saj institucionale. Pas tri palë zgjedhjesh të njëpasnjëshme, vendi ende nuk ka arritur të krijojë institucionet e plota dhe funksionale që i nevojiten një shteti demokratik. Përballë kësaj gjendjeje, pozita dhe opozita nuk kanë më luksin të sillen sikur problemi i Kosovës është thjesht një çështje kalkulimesh partiake.
Është jashtë çdo logjike që për kaq gjatë liderët politikë të mos arrijnë një marrëveshje për formimin e institucioneve. Kosova nuk mund të mbahet peng i egove personale, ambicieve partiake dhe interesave të grupeve të ngushta. Shteti është shumë më i madh se çdo parti dhe e ardhmja e tij është shumë më e rëndësishme se karriera e cilitdo lider.
Takimet e herëpashershme politike, që përfundojnë pa marrëveshje dhe pa asnjë rezultat konkret, nuk mund të paraqiten më si përpjekje serioze për zgjidhjen e krizës. Përkundrazi, ato po shndërrohen në një spektakël të lodhshëm e bajat politik, që ka humbur durimin e qytetarëve dhe po e dëmton rëndë imazhin e Kosovës.
Pozita duhet ta kuptojë se fitorja në zgjedhje nuk është licencë për ta mbajtur vendin në bllokadë. Opozita, ndërkaq, duhet ta kuptojë se kundërshtimi politik nuk nënkupton bllokimin e shtetit. Të dyja palët kanë përgjegjësi kushtetuese, politike dhe historike.
Kosova nuk ka nevojë për fitues e humbës në këtë krizë. Ajo ka nevojë për burrshtetasë që dinë të bëjnë kompromis kur interesi i shtetit e kërkon. Ka nevojë për liderë që janë në gjendje ta vendosin Kosovën mbi partinë, institucionet mbi interesin personal dhe të ardhmen e vendit mbi kalkulimet e radhës.
Prandaj, kjo është koha e fundit për një marrëveshje politike serioze. Duhet t’i jepet fund qeverisjes me ushtrues detyre në postet më të larta shtetërore dhe institucioneve të paplota. Kosova duhet të rikthehet sa më shpejt në normalitetin institucional, sepse çdo ditë e humbur prodhon kosto të reja politike, ekonomike dhe ndërkombëtare.
Historia do t’i gjykojë të gjithë. Jo vetëm për atë se çfarë fituan në zgjedhje, por edhe për atë se çfarë bënë kur shteti kishte nevojë për ta.
Kosova sot nuk kërkon liderë që dinë të fitojnë beteja partiake. Kërkon shtetarë që dinë ta shpëtojnë vendin nga ngërçi.
Pra, ju lider të nderuar dhe deputetë, që u ka zgjedhur populli të na përfaqësoni jepni fund këtij ngërçi politik të stërzgjatur, sepse e morët në qafë këtë popull dhe na bëtë gaz para botës!
Më 19 gusht 2026
