____
Portali Drini | 9 nëntor 2026
Imami “shqiptar” Bashkim Aliu është larguar nga të gjitha funksionet drejtuese në organizatat islame FIDS dhe VIOZ në Zvicër, pas hulumtimit të gazetës zvicerane SonntagsZeitung lidhur me deklaratat e tij homofobe dhe pjesëmarrjen në një konferencë me përfaqësues të qarqeve islamiste.
Sipas raportimeve, Aliu kishte cilësuar Paradën e Krenarisë në Prishtinë si “paradë turpi”. Në janar të vitit 2024, ai kishte marrë pjesë në një konferencë në Katar, ku kishte mbajtur fjalim edhe udhëheqësi i atëhershëm i Hamasit, Ismail Haniyeh. Megjithatë, pjesëmarrja në atë aktivitet nuk provon vetvetiu lidhje organizative me Hamasin.
Rasti ka ngritur shqetësime edhe për përgjegjësinë e drejtuesve fetarë dhe transparencën e organizatave që përfitojnë financime publike në Zvicër.
Mendimi im
Sa herë duhet të na dëshmohet se përfaqësuesit që përhapin intolerancë dhe afrohen me qarqe të islamizmit radikal mund ta dëmtojnë rëndë imazhin e shqiptarëve në Zvicër?
Si shqiptar që jeton në këtë vend, më shqetëson fakti që raste të tilla mund të hedhin hije mbi një komunitet të tërë, i cili prej vitesh punon, kontribuon dhe respekton ligjet e shtetit zviceran.
Ne nuk kemi nevojë për predikues që krijojnë përçarje, por për përfaqësues që promovojnë paqen, respektin, integrimin dhe bashkëjetesën.
Besimi fetar është e drejtë e secilit, por askush nuk duhet ta përdorë fenë si mburojë për intolerancën apo ekstremizmin.
Është koha që institucionet të jenë më vigjilente dhe që çdo udhëheqës fetar të mbajë përgjegjësi për deklaratat dhe veprimet e veta.
Shqiptarët në Zvicër meritojnë të përfaqësohen me dinjitet, jo të dëmtohen nga skandale të tilla psudoshqiptarësh.
Burimi: SonntagsZeitung dhe mediat zvicerane.
