Zeqir Bekolli, shkrimtar, Prishtinë
Kur janë caktuar ndërmjetës për bisedime Lajçak dhe Borel është ditur se do të ketë njëanshmëri në bisedime. Këta dy zyrtarë evropian vijnë nga shtetet që nuk e njohin Republikën e Kosovës dhe mbështesin fuqishëm Serbinë. Në shumë takime, përfaqësuesit e këtyre dy shteteve nuk po sillen si zyrtarë evropian, por si zyrtarë të shteteve nga vijnë.
Edhe vizita e fundit e Lajçakut në Prishtinë dhe deklarata e tij skandaloze se Ura mbi lumin Ibër duhet të lëshohet vetëm pas marrëveshjes Kosovë-Serbi, pos që përbën një deklaratë me rreziqe, ajo e legjitimon Serbinë si faktor në pjesën Veriore dhe sinjalizon edhe për shenja lufte.
Me një fjalë, deklarata e Lajçakut, i cili prezanton në këtë rast BE-në, lë për të kuptuar se diçka nuk është në rregull edhe me Bashkimin Evropian, i cili po e zhagitë çështjen deri në absurditet, duke anuar haptas ndaj Beogradit, dhe duke e rrezikuar tërësinë territoriale të vendit tonë. Njëanshmëritë e Lajçakut dhe Borrellit, kaherë janë vënë re, por mosreagimi e mosdistancimi i BE-së ndaj veprimeve e deklaratave të tyre , po sjell dilema edhe për pozicionin e saj në raport me Kosovën.
Është tashmë e ditur se Serbia po kërkon territor në Kosovë, po kërkon formimin e një Republike Serbe me qëllim që Kosova të pushojë se ekzistuari si shtet i pavarur e të shërbejë si një oazë jo fuknsionale në hapsirat e Ballkanit.
Në këtë situatë, institucionet e vendit dhe subjektet politike dhe mbarë populli duhet vlerësuar rrezikun, që po i kanoset vendit, dhe në këtë situatë duhet të jenë bashkë në secilin veprim, në mënyrë që të mos lejojnë bosnjizimin e Kosovës i cili tashmë ka dalë në sipërfaqe.
