Januz Januzaj
Poezi nga burgu
FYTYRA
Hasan Mekulit
Sikur deri tash
Qëndro he burrë
Jeta gënjen pa masë
Jeta gjuan me rrasë
Ruaju prej vetvetes
Prej nacionalizmit
pa internacionalizëm
Prej internacionalizmit pa
nacionalizëm
Nëse ka
Ruaju atyre që të
betohen
Ruaju, sikur atyre që të
hanë
Mos i beso mëngjesit
Dita shpeshherë
mashtron
Pa hesap, pa nder
Si jeta.
*
Qëndro, he burrë
I fortë
Para fuqisë
I mençur
Para shpifjes.
*
Qëndro, para
njeringrënësit
Mbahu, ashtu
Para nishanit,
para kthetrave
Para dhëmbit
Qëndro, mos u përkul
Përball veriut
Dimër është.
*
Qëndro, po të mësyjnë
-Ty
Të sharë
Të shënuarin me emra
Që rrasen me mbeturina
Të mallkuarin pse lind
dielli
Pse vëllai e do vëllanë
Ty – Mekuloviqin!
Nacionalistin!
Irredentistin!
Burokratin!
Ty – vendorin!
Shkurtpamësin !
*
Cilët emra të mungojnë
Pa çfarë kryqëzimesh ke
mbetur
Cila lëkurë ka shpëtuar
Të gjitha këto prej
përgjimit
Je i vetes, i njerëzve
Ke një fytyrë një emër
Njëherë kemi lindur
Njëherë do të vdesim
Me dashuri në zemër.
Pozharevc, nëntor, 1985
Shënime për autorin
Januz Januzaj, i lindur në Lubozhdë, më 1 janar 1958, komuna e Istogut. Shkollën fillore të kryer në Vrellë, gjimnazin në Istog. Fakultetin e Drejtësisë të kryer në Universitetin e Prishtinës.
Në vitin 1981, i dënuar në Gjykatën e Qarkut në Prishtinë me 10 vjet burg, si njëri prej organizatorëve të Demonstratave studentore të marsit të vitit 1981. Pjesëmarrës i Luftës së Ushtrisë Çlirimtare të Kosovës për çlirimin e atdheut. Kryetar i Komunës së Istogut prej qershorit 1999 deri në dhjetor të vitit 2000. Njëri ndër themeluesit e Aleancës për Ardhmërinë e Kosovës.
Këshillëtar politik në Ministrinë e energjisë e minierave 2004 – 2008 Drejtor i Drejtoratit të shëndetësisë e mirëqenies sociale në Istog 2008 – 2010.
Prej vitit 2011, Inspektor i burgjeve në Inspektoratin e Ministrisë së Drejtësisë.
Ka të botuara katër vepra:
1. Libri i lirisë – bashkautor,
2. Në rrugën e lirisë – ditar lufte,
3. Shqipëria ime – unë dhe Ramiz Alia dhe
4. Ngritja e historisë i martuar dhe ka tre fëmijë.
Jeton në vendlindje.
