Zeqir Bekolli, Prishtinë
Rezultatet e PISA-s, jo vetëm këto të fundit por edhe të më hershme, flasin për mungesën e reformave në arsim dhe politizimin e skajshëm të arsimit shqip në Kosovë.
Këtë dëm shoqërisë sonë ia shkaktoi politika, që nga paslufta, duke mos harruar edhe dëmin e shkaktuar nga pushtuesi, pas viteve të nëntëdhjetë. Këto goditje që i mori arsimin shqip në Kosovë janë vështirë të riparueshme. Së pari, mësimi nëpër shtëpitë shkolla la pas vetës shumë zbrastësi të cilat nuk u kompensuan pas çlirimit me trajnime dhe ngritje profesionale. Së dyti, politizimi i shkollave e i universiteteve dhe shndërrimi i kolegjeve private në “oaza” biznesi përbëjnë goditjen tjetër të cilën e mori arsimi shqip në Kosovë.
Bie fjala, politikat partiake të punësimit, qoftë në shkolla, qoftë në universitete, e goditën për vdekje arsimin shqip në Kosovë, e pasojë e kësaj janë rezultatet e PISA-s, jo vetëm sivjet, por që nga paslufta.
Nëse bie fjala për emrimin e mësimëdhënësve e drejtorëve nëpër shkollat tona vendosin kryetarët e komunave, të cilëve nuk iu intereson fare cilësia e kandidatit, por përkatësia partiake, atëherë del qartë se niveli i arsimit nuk mund të jetë ndryshe, pos ky që është.
Veç kësaj, mungesa e investimeve në arsim në ngritjen e cilësisë, mospajisja me mjete moderne të shkollave e kabineteve të tyre, në harmoni me mësimin bashkëkohor po i jep këto rezultate çfarë i kemi.
Për shkak të ndërhyrjeve të vrazhda të politikës në sistemin arsimor, munguan edhe reformat e domosdoshme në mësimdhënie, në cilësi dhe kuadro. Angazhimi i gjysëmanalfabetëve me diploma nëpër proceset mësimore, qoftë në nivelin lokal apo atë qendror na solli deri këtu.
Prandaj, puna e parë që duhet bërë është depolitizimi i shkollave e universiteteve , zvogëlimi i kolegjeve që nuk ofrojnë cilësi dhe kushte bashkëkohore shkollimi, financimi më i madh në arsim, në kuadro e cilësi dhe transparenca me rastin e rekrutimit dhe lirimi nga kuadrot e paafta, që janë pjesë e arsimit shqip.
Vetëm në këtë mënyrë mund të ecët për para , duke kërkuar njëkohësisht edhe llogari nga të gjithë ata që udhëhoqen me arsimin në Kosovë. Por a është e mundur kjo në Kosovë, gjithsesi se jo, për faktin se me mendësinë e deritashme në raport me arsimin vështirë se mund të ecët për para.
