Arif Ejupi
Vëllezërit Riad dhe Valdet Dema nga fshati Pollatë i Podujevës, edhe pse me një përvojë jo shumë të gjatë në fushën e bletarisë, kanë shënuar suksese të njëpasnjëshme. Këtë veprimtari me pak shpenzime dhe me mjaft leverdi ata e nisën fillimisht vetëm me pesë koshere bletësh.
Me dëshirën e madhe për të avancuar në këtë degë, ata u këshilluan me ekspertë të fushës dhe studiuan literaturë profesionale. Pas fitimit të njohurive bazë dhe vlerësimit të terrenit nga profesionistë, Riad dhe Valdeti vendosën që mbarështimin dhe shumëzimin e bletëve ta zhvillojnë në fshatin e tyre të lindjes – Pollatë të Podujevës.
Prej kohësh dihet se Gryka e Mavriçit, bashkë me fshatrat përreth, ofron kushte të përshtatshme natyrore për zhvillimin e bletarisë. Megjithatë, deri në shkëputjen e Kosovës nga sundimi serb, bletaria në zonën e Llapit ishte e pazhvilluar.
Me këtë disiplinë të rëndësishme shoqërore, për shkak të mungesës së njohurive dhe pajisjeve adekuate, merreshin pak familje. Kullimi i mjaltit bëhej me metoda primitive dhe jo higjienike, çka ndikonte negativisht në cilësinë e produktit përfundimtar.
Pas pavarësimit të Kosovës, Ministria e Bujqësisë, Pylltarisë dhe Zhvillimit Rural, duke u frymëzuar nga modeli slloven dhe ai i vendeve të rajonit, filloi të japë subvencione për bletarët e interesuar.
Në të gjitha komunat e Kosovës u formuan shoqata të bletarëve, duke mundësuar shkëmbim përvojash dhe ngritje profesionale të kultivuesve. Po ashtu, kjo ministri ofroi pajisje moderne për filtrimin dhe përpunimin e mjaltit, duke e ngritur këtë sektor në nivel ndërkombëtar.
Kjo përkrahje institucionale u bë një shtysë e fuqishme edhe për vëllezërit Dema, të cilët iu qasën me përkushtim dhe seriozitet të plotë bletarisë. Sot, ata numërojnë mbi 250 shoqëri të shëndetshme bletësh dhe konsiderohen ndër bletarët më të suksesshëm në komunën e Podujevës.
Edhe pse vitet e fundit shumë bletarë të kësaj komune janë përballur me vështirësi për shkak të kushteve klimatike jo të favorshme dhe mungesës së nektarit, Riadi dhe Valdeti kanë arritur ta ruajnë shëndetin e bletëve të tyre, falë përkushtimit të vazhdueshëm dhe menaxhimit të shkëlqyeshëm.
Mjalti i prodhuar në Pollatë të Podujevës, falë punës së tyre, është vlerësuar me cilësinë më të lartë në Panairet Ndërkombëtare të Tuzllës dhe Tetovës, duke u shpërblyer për dy vite radhazi me vendin e parë, në një konkurrencë të denjë prodhuesish të mjaltit.
“Puna me bletët kërkon dashuri, durim e mbi të gjitha vëmendje. Ne kemi bërë që Pollata të njihet jo vetëm për bukuritë e rralla natyrore, por edhe për produktin e pastër të mjaltit. Kjo shihet më së miri nga vlerësimi i bërë mjaltit tonë në Panairet Ndërkombëtare,” – thonë vëllezërit Riad dhe Valdet Dema.
Vizioni dhe përkushtimi i tyre duhet të merren si shembull frymëzimi për të gjithë të rinjtë që duan t’i kthehen jetës në këtë fshat piktoresk. Në Pollatë dhe fshatrat përreth është paraparë edhe ndërtimi i një liqeni artificial. Në rast se ky projekt madhor jetësohet, banorëve të kësaj pjese të Llapit do t’u shtohet dëshira për kthim dhe jetë të dinjitetshme në tokat e tyre stërgjyshore.
Gjenevë,29 shtator 2025
