Prokuroria Speciale ta arrestoj edhe Ramush Haradinajn, Hashim Thaçin, dhe Fatmir Limajn
Për shkak se, në vitin 2018, Ramush Haradinaj në pozitën e Kryeministrit, Hashim Thaçi në pozitën e Kryetarit të Republikës së Kosovës dhe Fatmir Limaj si kryetar i NIMSA-s në koalicion me PDK-në dhe AAK-në, kanë konsumuar veprën penale të mbylljes së Institutit për Dokumentimin e Krimeve të Luftës në Kosovë. Kjo është vepër penale më e rëndë se sa pasaktësitë në librin e Shkëlzen Gashit “Masakrat në Kosovë 1998-1999” apo edhe të cilit do qoftë autor tjetër, sepse, për dallim nga gabimet, huqjet, keqinterpretimet, dhe shtrembërimet paraqet mohim institucional i krimeve të luftës dhe krimeve kundër njerëzimit, thua se nuk kanë ndodhur.
Në këtë zbrazëtirë që e kishte krijuar Qeveria e Ramush Haradinajt dhe Presidenca e Hashim Thaçit në koalicion me Fatmir Limajn ose të gjitha së bashku të njohura me etiketat e vetshpallura “krahu i luftës”, “çlirimtarë”, etj., del Shkëlzen Gashi për ta bërë një përmbledhje të krimeve ose mbledhjen e të dhënave që do të duhej t’i siguronte Instituti të cilin “çlirimtarët” e kishin mbyllur. Pas mbylljes së Istitutit, respektivisht më 2020, Dhomat e Specializuara të Kosovës i arrestojnë disa udhëheqës kyç të UÇK-së dhe i dërgojnë në Gjykatën Speciale në Hagë për t’i gjykuar për krime të luftës dhe krime kundër njerëzimit. Deri më tani, disa edhe i ka dënuar gjykata, dhe gjasat janë që t’i dënojnë edhe ata që po i mbajnë në paraburgim tash e pesë vite e gjysmë. Themelimin e Dhomave të Specializuara dhe të Gjykatës Speciale nuk e ka votuar Shkëlzen Gashi por kryesisht ata që e mbyllën Institutin për Dokumentimin e Krimeve të Luftës në Kosovë. Pse nuk protestuan veteranët e UÇK-së kundër mbylljes së këtij instituti? Ndonëse ata nuk kanë përgjigje, ngjarjet nga realiteti e sqarojnë ambicien e tyre; këtyre u intereson vetëm pushteti dhe plaçka, e jo masakrat dhe krimet e luftës të Serbisë në Kosovë. Pushteti i koalicionit qeverisës dhe presidencial i PDK-së dhe AAK-së posa e mbylli institutin, u angazhua shumë për ndarjen e Kosovës ose krijimin e Serbisë së Madhe në bashkëpunim me regjimin e Aleksandar Vuçiqit dhe Edi Ramën. Hashim Thaçi në njërën anë me planin e ashtuquajtur për “shkëmbim territoresh”, kurse Ramush Haradinaj në anën tjetër “Punoj edhe me njerëz nga veriu [i Kosovës] si për shembull, Millan Radojçiq, ose njani që pyetet për gjithçka!” [Ndoshta ai është pyetur dhe ka vendosur edhe për mbylljen e Institutit për Dokumentimin e Krimeve të Luftës në Kosovë!].
Instituti i Krimeve të Kryera gjatë Luftës në Kosovë (shih ikonën e bashkangjitur IKKL, marrë nga faqja zyrtare e tij) u rithemelua pasi Kuvendi i Kosovës më 13 korrik 2023 e miratoj ligjin për rithemelimin e tij. Mirëpo, ekziston rreziku që të njëjtin institut të rithemeluar ta rimbyllin por të njëjtat parti politike që e kishin mbyllur më parë (PDK dhe AAK). Atëherë do t’i jepej mundësia edhe Shkëlzenave tjerë të nxjerrin librat e veta si të dojnë. Pse jo?
