Nuk është më çështje besimi. Është demonstrim force ideologjike në hapësirën publike.
Pamjet e grupeve islamiste që shtrihen nëpër rrugët e Prishtinës, nga Muharrem Fejza deri në lagje të tjera, duke bllokuar rrugë, trotuare dhe jetën normale të qytetarëve, nuk kanë të bëjnë me përulësi ndaj Zotit. Besimi nuk ka nevojë për spektakël publik, as për okupim të qytetit. Kjo është politikë identitare e maskuar si rit fetar.
Kur ke qindra xhami në Kosovë — mbi 800 — shumë prej tyre gjysmë të zbrazëta, atëherë dalja në rrugë nuk është nevojë fetare. Është mesazh politik. Është provokim simbolik. Është përpjekje për ta normalizuar imponimin e pranisë ideologjike në zemër të jetës publike.
Rruga nuk është xhami. Hapësira publike nuk është territor për demonstrime fetaro-politike. Qyteti nuk mund të mbahet peng nga rituale kolektive që bllokojnë lëvizjen, krijojnë tension dhe imponojnë një identitet të caktuar mbi të gjithë të tjerët.
Kjo është fytyra e islamit politik: fillimisht kërkon “tolerancë”, pastaj kërkon dominim simbolik të hapësirës publike. Sot bllokohet një rrugë për lutje masive, nesër kërkohet nënshtrim kulturor ndaj agjendës së tyre. Historia e shumë shoqërive e ka treguar këtë model.
Kosova është republikë civile, jo shtet fetar. Identiteti ynë kombëtar nuk është ndërtuar mbi fundamentalizëm oriental, por mbi frymën europiane, rezistencën kombëtare dhe bashkëjetesën qytetare. Prandaj çdo përpjekje për ta shndërruar hapësirën publike në skenë të propagandës fetaro-politike duhet të ndalet.
Duhet reagim institucional. Komuna dhe organet e rendit nuk mund të sillen sikur nuk po ndodh asgjë. Ligji duhet të vlejë për të gjithë. Askush nuk ka të drejtë të uzurpojë rrugët dhe jetën publike në emër të ideologjisë së vet.
Po aq i rëndësishëm është edhe reagimi shoqëror. Duhet zgjim qytetar dhe iluminim kombëtar kundër kësaj maskarade kolektive që po paraqitet si “devotshmëri”, por që në thelb është shfaqje e organizuar e islamit politik në hapësirën publike të Kosovës.
Heshtja përballë ekstremizmit simbolik sot, bëhet normalizim nesër.
