Idriz Zeqiraj, Gjermani
___
Pesëshja BE-SHBA zbriti, sërishmi, në Prishtinë, koxha me bujë. Megjithatë, asgjë e re. Edhe pse krerët shtetërorë e partiakë, pozitë dhe opozitë, janë të njëzëshëm se “pas 24 shtatorit 2023, gjithçka është ndryshe”, rrjedhimisht, as dialogu nuk mund të vazhdojë si më parë, pra, duhet qasje krejtësisht tjetër.
Aksioni i armatosur shtetëror i Serbisë, ishte me shumë se një sulm terrorist, ishte agresion kundër shtetit të Kosovës. Dhe, kjo dëshmohet me angazhimin njerëzor ushtarak dhe arsenalin e armatimit special, për ta realizuar një sulm frontal, me përmasa ushtarake ofenzive, me qëllimin kriminal ndarjen, pushtimin e veriut të Kosovës.
Ky fakt do të ishte i mjaftueshëm, për emisarët e BE-së dhe të SHBA-së, që ta kishin një qasje të unifikuar me shtetarët e Kosovës, për dialogun e mëtejmë, duke e hequr njëherë e përgjithmonë -Asociacionin- nga agjenda e bisedimeve, sepse Asociacioni është kancer për Kosovën.
Por, çfarë mesazhi dha delegacioni i pesëshës në fjalë? Asnjë ndryshim nga deklarimet paushalle të para agresionit të 24 shtatorit! I pari foli ndërmjetësuesi, shumë i përfolur për njëanëshmëri, me emrin shumë cinik e hiç objektiv, Mirosllav Lajçak. Pas një dënimi verbal klishe, rutinor, për sulmin e armatosur të grupit serb në Banjskë të Zveçanit, vazhdoi me shpalosjen e porosive për qeverinë e Kosovës. Ndër mesazhet e para ishte: “Kosova duhet ta bëjë -Asociacionin- menjëherë!” Pra, qëndrimi i tij, gjithnjë në emër të delegacionit, ishte sikur nuk ka ndodhur asgjë më 24 shtator në veriun e Kosovës!
Por, çfarë pritej të thonin e vepronin emisarët e BE-së dhe SHBA-së, pas agresionit të armatosur të Serbisë ndaj Kosovës, me 24 shtator 2023, në Banjskë të Zveçanit:
1) Ndërhyrjen e armatosur duhet ta emërtonin me falorin adekuat -agresion fashizoid- të Serbisë kundër shtetit të pavarur të Kosovës, të njohur edhe nga Gjykata Ndërkombëtare;
2) T`i vinin sanksione të ashpra Serbisë, duke ia hequr ato Kosovës, me kërkim-falje, si të padrejta, arbitrare dhe një krim i turpshëm ndërkombëtar;
3) Të hapet menjëherë Ura e Ibrit, për lëvizje të lirë edhe për automjete. Dhe, presidenti Macron t`i kërkojë falje, në emër të popullit francez, për ndarjen 24 vjeçare të Mitrovicës, popullit të Kosovës;
4) Të vendoset ushtria e Kosovës, jo për kontrolle rutinore, por për ruajtjen klasike të kufirit shtetëror, me hapësirën 500 + 500 metra, reciprokisht, tokë të dy shteteve, të pastruar nga bimësia dhe e ndriçuar, me ngritje karaullash, në gjatësinë lineare tej 365 kilometra, aktualisht, nën monitorimin e KFOR-it, duke e koracuar dhe pamundësuar çfarëdo ndërhyrje diversioniste, të armatimit apo të kontrabandës;
5) Plani franko-gjerman është skajshëm asimetrik, në raport me Serbinë, andaj duhet të korrigjohet, deri në përmasën e simetrisë dy-palëshe;
6) Të aplikohen menjëherë dhe pa kushte targat e Kosovës në të gjithë territorin e Republikës të Kosovës;
7) Shpallja e jashtëligjshme e Partisë “Lista Serbe”, me motivacionin:
a) Për krimet në vijimësi, ndaj komunitetit serb, në veçanti, dhe të komuniteteve tjera, në përgjithësi, në veriun e Kosovës;
b) Sulmet banditeske, ne koordinim me të ashtuquajturën “Shoqërinë Civile” dhe “Brigada e Veriut”;
c) Vrasja e policit Enver Zymeri në Doganën e Kosovës në veri dhe rrezikimi i kolegëve të tij;
d) Djegia e Doganës të Kosovës;
e) Vënia e përsëritur të barrikadave;
f) Djegia e veturave dhe të pasurive të qytetarëve, në veriun e Kosovës;
g) Protestat e dhunshme të 29 majit 2023 dhe në vazhdim, në Zveçan dhe komunat tjera në veriun të Kosovës, ku janë sulmuar me gurë, stupca, plumba policia, ushtarakët e KFOR-it, dy syrësh nga plagët e marrura, u janë amputuar këmbët;
h) Goditja e pakontrolluar e gazetarëve, kameromanëve me mjete të forta, dhe të popullatës vendore; i) Dhe, për të kulmuar krimet serike, më 24 shtator 2023, me urdhër të Beogradit zyrtar, përmes strukturave të saj speciale, bëri agresion ndaj shtetit të Kosovës, me ç`rast mbeti i vrarë rreshteri i Policisë të
Kosovës, Afrim Bunjaku dhe u plagosën dy kolegët e tij.
j) Arsye shtesë është se nënkryetari i kësaj partie, Millan Radioçiq, aleat besnik i presidentit Aleksandër Vuçiq, mori përsipër drejtimin e agresionit ndaj shtetit të Kosovës, më 24 shtator 2023!
Realisht, nuk pritej nga delegacioni i pesëshës përmbushja e 7(shtatë) kërkesave. Dhe, kjo dëshmohet me deklaratën refuzuese të Lajçak, të bërë në emër të delegacionit, por, aprovuese për Asociacinin! “E theksuam nevojën për të themeluar Asociacionin e komunave me shumicë serbe në Kosovë pa vonesë!”
Ndërkohë, përgjigja e kryeministrit Albin Kurtit, dhënë Lajçakut me shokë, ishte e drejtëpërdrejtë logjike dhe parimore: “Procesi i dialogut duhet të rimendohet pas sulmit të 24 shtatorit”. Dhe, ende më qartë: “Është i nevojshëm reflektimi cilësor dhe një qasje e re”. Atëherë, ” i mbetet të zotit të nxjerrë gomarin nga balta”,- konstaton populli. Pra, qeveria e Kosovës duhet të ngulmojë për përshpejtimin e bashkimit të Mitrovicës, duke i përmbushur, të paktën, të 7(shtatë) kërkesat e shënuara më lartë.
Është koha që qeveria e Kosovës të vendosë: “Ose hunin, ose tirqit!” Të rreket me përkushtim dhe guxim, për realizimin e këtyre çështjeve dhe të tjerave në shërbim të sovranitetit të Kosovës. Kujdes, çështjen e shpalljes të paligjshme të “Listës Serbe”, në veçanti, por edhe të çështjeve të tjera, në përgjithësi, duhet konsultim me SHBA-në dhe miqtë tanë evropianë, edhe pse në numër janë të paktë.
