TIRANË, 9 shkurt/ATSH/ Ministri i Kulturës i Kosovës, Hajrulla Çeku njoftoi se, ky është viti i fundit i projektit të madh për rivitalizimin e qytetit të vjetër të Janjevës.
Vlera totale e investimit në këtë projekt që synon shndërrimin e Janjevës në destinacion të rëndësishëm turistik është rreth 3.8 milionë euro, bashkëfinancim me zyrën e Bashkimit Europian në Kosovë dhe me partner zbatues UNDP Kosovo.
“Restaurimi i 14 shtëpive po vazhdon sipas dinamikës, ndërsa paralelisht po punohet në fuqizimin e kapaciteteve lokale për ofrimin e shërbimeve cilësore turistike”, bëri me dije ministri i Kulturës, Rinisë e Sportit, Hajrulla Çeku.
Janjeva është një qytezë, me të kaluar dhe histori të pasur. Ajo është një qytezë karakteristike dhe shumë e veçantë, me rrugë të ngushta e shtëpi të vjetra.
Janjeva ndodhet mes kodrave të larta, rreth 600 metra mbi nivelin e detit dhe vetëm 18 km në juglindje të Prishtinës. Ka qenë e njohur veçanërisht për xehetari (ar e argjend) e zejtari; për përpunim të metaleve e të plastikës, për artizanate, për tregti etj.
Konsiderohet se Janjeva është një lokalitet i lashtë, që daton nga shek. IV, por, në dokumentet e shkruara përmendet nga shek. XIV, në vitin 1303.
Janjeva është gjithashtu vendlindja e Atë Shtjefën Gjeçovit (1874 – 1929), veprimtarit të shquar të lëvizjes atdhetare shqiptare, që ishte edhe prift, etnograf, arkeolog, shkrimtar, përkthyes e folklorist.
