____
ALEANCAT E VJETRA PO DALIN HAPUR
____
Aleancat e vjetra ideologjike, të komunizmit me rrënjë në pansllavizmin ortodoks dhe të Islamit Politik me rrënjë në otomanizëm, sot po veprojnë gjithnjë e më hapur në Dardanin tonë.
Ajo që për një kohë të gjatë është bërë në heshtje, sot po bëhet publikisht. Fytyra e vërtetë e kësaj aleance po del në shesh. Sot paskan dhënë urdhër që flamuri i UÇK-së të ngrihet në minaret e të gjitha xhamive.
Kjo nuk është një çështje simbolike që duhet kaluar në heshtje. Është një përpjekje e qartë për ta përvetësuar dhe instrumentalizuar UÇK-në, duke ia ndryshuar kuptimin dhe karakterin e luftës së saj. UÇK-ja nuk bëri luftë fetare. UÇK-ja bëri luftë çlirimtare dhe kombëtare për lirinë e Kosovës dhe për mbrojtjen e popullit shqiptar.
Tentuan ta bëjnë këtë gjatë luftës, por nuk ia dolën. Vazhduan pas luftës, hap pas hapi, duke depërtuar në hapësira ku nuk e kishin vendin. Dhe sot, siç duket, po shohim një tjetër përpjekje për ta vendosur UÇK-në nën një narrativë fetare që nuk i përket historisë dhe sakrificës së saj.
Kjo është një përpjekje që duhet kundërshtuar me vendosmëri. UÇK-ja është pjesë e historisë kombëtare të Kosovës dhe nuk mund të bëhet pronë ideologjike e askujt.
Kosova nuk duhet të lejojë që lufta çlirimtare të instrumentalizohet për interesa politike, fetare apo ideologjike. Kushdo që përpiqet ta bëjë këtë, duhet të përballet me reagim të fuqishëm qytetar dhe politik.
Heshtja përballë kësaj dukurie do të ishte gabim. Kosova dhe populli shqiptar duhet të reagojnë shpejt, qartë dhe pa kompromis, për ta mbrojtur karakterin kombëtar e çlirimtar të UÇK-së dhe për të mos lejuar deformimin e historisë sonë.
