Florim Zeqa
Pas 23 dështimeve të njëpasnjëshme për konstituimin e Kuvendit, Parlamenti është kthyer në cirk tragjikomik për qytetarët, kurse foltorja në hollin e Kuvendit është kthyer në ‘foltore të parlamentit mediatik’, ku deputetët dhe liderët bllokues partiakë janë duke i shfrytëzuar mediat për debat jashtëparlamentar për të shfryer mllefin ndërpartiak për akuza të ndërsjella kundër njëri-tjetrit!
Parlamenti në shpinë të dreqit
Liderët partiakë dhe deputetët e të gjitha partive politike pa dallim, mezi presin të përfundojnë 3 minutat e punës së Kuvendit për të dalur në hollin e Kuvendit për t’iu drejtuar medieve për t’i ‘arsyetuar’ qëndrimet partiake për moskonstituimin e Kuvendit!
Secili lider partiak dhe secili deputet në mënyrën e vet e shesin patriotizmin e tyre fallso personal duke u thirrur në interesin e shtetit dhe nevojën e një konsensuesi ndërpartiak që vet po e rrënojnë në çdo 48 orë!
Këtë çasje rrënuese të Parlamentit më së miri e përshkroi veprimtari i viteve të 90-ta, Zenun Zeqa përmes një poezie politike, ku e shprehë zhgënjimin personal në të zgjedhurit e popullit, si më poshtë:
Parlamenti në shpinë të dreqit!
Në shpinë të dreqit ka hyp Parlamenti,
për të 23-n herë mbeti pa kryetar,
partitë janë bërë pikë e pesë,
për votuesin as që mendojnë.
Pa humbur kohë populli duhet të veproj,
para seancave që të reagoj,
t’ia bëjë si në Vatikan,
pa e zgjedhë kryetarin/en,
deputetët jashtë mos me dalë.
Këtë të keqe në Parlamentin tonë,
bota demokratike lojë po e konsideron,
askund deri më sot nuk ka ndodhë,
23 herë konstituimi të dështojë.
Teksti i poezisë së mësipërme të veprimtarit e tregon zhgënjimin qytetar në të zgjedhurit e popullit dhe thërret për kushtrim popullor që kjo e keqe për vendin të ndalojë derisa nuk është bërë vonë. Ngase, bota e civilizuar dhe demokratike ka filluar t’na harroj!
Nëse nuk shtohet trysnia popullore dhe presioni ndërkombëtar, këta lider partiakë dhe kuvendar do t’i kalojnë edhe 23 “tentativa” tjera të kota për 3 minuta duke marrë paga dhe meditje të majme nga buxheti i shtetit duke u zgërdhirë me qytetarët e mjerë, të cilëve ua grabitën votën nën mashtrim për mirëqenje dhe zhvillim ekonomik!
Florim Zeqa, 30 Maj 2025
