Pamje e Leposaviqit
nga: Gani I. Mehmeti
VERIU I KOSOVËS NUK ËSHTË TOKË MERE (NEUTRALE) QË TA GRABISË KUSH MË PARË!
Veriu i Kosovës, ashtu si krejt Kosova, është KOSOVË. Krejt bisedimet rreth këtyre komunave dhe gjoja të dretjave për serbët, janë politike me qëllim që, këto komuna të shkëputen nga Kosova dhe t`i bashkangjiten Serbisë për arsye të pasurisë nëntokësore të saj, jo për të drejtat e serbëve.
Përndryshe, as që do të kishte nevojë të zhvilloheshin bisedime për kurrfarë të drejtash e as asocacioni për komunat me shumicë serbe, sepse në të gjitha ato komuna nuk kalon 3 për qindshi i popullatës së Kosovës. Dhe, përveç kësaj, serbëve nuk u mungojnë të drejtat në Kosovë, këtë e dinë edhe serbët, edhe Serbia, edhe ndërkombëtarët. Këtu qëndron diçka tjetër, për çka bashkësia ndërkombëltare e di, por po gabon në përkrahjen e serbëve.
Vuçiqi më kot ankohet, qahet e kërkon më shumë për ta, pse nuk kanë asnjë të keqe prej shqiptarëve e as nga qeveria, e cila nuk kërkon kurrgjë më shumë, përveç zbatimin e ligjeve të Kosovës edhe në këtë rajon.
Në anën tjetër, veriu i Kosovës është territor i Kosovës, nuk është një tokë djerrë dhe e lirë që të bëhen shtyrje se kush po e përfiton më parë! Ajo nuk është tokë mere (e lire) mes Kosovës e Serbisë, është territore Kosovës dhe të gjithë e dinë këtë, të gjithë e thonë këtë. Dhe, deri sa është territory i Kosovës, me çfarë të drejte dikush kërkon që ajo t`i jipet dikujt tjetër!?
Deri sa është tokë e Kosovës, cili ka të drejtën më të luftojë për të, ai i të cilit është, apo ai i të cilit nuk është, por kërkon ta ketë, ta pushtojë, uzurpojë apo si do që të thuhet. Gjithherë në të drejtën e tij është ai që e mbron të vetën. E, deri sa, Serbia përpiqet, gjoja, për të drejta më të mëdha të serbëve në këto komuna, ata i kanë të gjitha të drejtat, përveç një të drejte: Se ata janë banorë e qytetarë të Republikës së Kosovës e jo banorë e qytetarë të Republikës së Serbisë. Këtu është dhe bëhen ankesat e serbëve, brenda e jashtë Kosovës. Këtu pse ata nuk duan ta njohin Republikën e Kosovës. Këtu do duhej të ngulnin këmbë edhe ndërkombëtarët, si SHBA e BE duhet t`u tregojnë serbëve se ata duhet të respektojnë flamurin, stemën dhe gjithçka tjetër të Republikës së Kosovës, si dhe vetë Republikën e Kosovës.
Thuhet se serbët kanë qenë të integruar në Kosovë! Kjo qe një nga gënjeshtrat më të mëdha. U pa kur u kërkua me letërnjoftime të Kosovës, pastaj edhe me targa. Unë nuk di një rast kur veturat e qytetarëve të një shteti mund të regjistrohen në një shtet tjetër! Kjo është e papranueshme. Sikur të kishin qenë të integruar, ata do i kishin vendosur flamujt dhe stemat e Republikës së Kosovës nëpër vende publike, nëpër zyre, nëpër komuna, gjykata, prokurori, shkolla, spitale e ku jo tjetër që nuk është as e nevojshme t`i numërojë të gjitha.
A do të lejonin Lajçak e Borell nëpër shtetet e tyre të largohen flamuj, stema e gjithçka tjetër shtetërore për t`u vendosur flamuj, stema e gjihçka tjetër të ndonjë shteti tjetër në shtetet e tyre? Assesi. Prandaj, nuk është vështirë të jeshë i drejtë, të mendosh si për vete edhe për të tjerët.
Ata kanë mundur ta bëjnë këtë për këto 15 vite nga shpallja e Pavarësisë së Kosovës dhe për këto 12 vite bisedime mes Kosovës e Serbisë.
Në anën tjetër, bisedimet iu imponuan Kosovës me të padrejtë me Serbinë. Ato do duhej të zhvilloheshin vetëm me serbët e Kosovës, pa lejuar që në punët e brendshme të Kosovës të përzihej Serbia. Ky gabim u bë nga vetë ndërkombëtarët, gjoja për normalizimin e marrëdhënieve e ato po bëhen gjithherë e më të vështira, më të ashpra e më larg normalizimit.
Kosova ka mundur të bëhet anëtare e çdo organizate ndërkombëtare edhe pa miratimin e Serbisë. Dhe ashtu, deri tani, vërtet do të ishin normalizuar marrëdhëniet, pse vetë dy shtetet do të bisedonin për mrrëdhënie shtetërore edhe pa “lehtësimin” e bisedimeve përmes BE.
BE vetëm sa i ka komplikuar e ndrlikuar bisedimet, duke ia dhënë krahun Serbisë vazhdimisht. E, sikur të ishte unike vetë BE, do ta kishin njohur Kosovën të gjitha shtetet e saja, por nuk po mundin t` i bindin ta njohin Kosovën edhe 5 shtet të tjera, që janë proserbe.
Së fundmi, është e drejtë e Kosovës të mos e japë veriun e saj, këtë të drejtë duhet ta mbajnë edhe SHBA e BE, që t`i tregojnë edhe Serbisë, se nuk është e drejtë e saj të marrë tokë të huaj, që nuk është e saja. Në anën tjetër, t`i tregojnë përfundimisht se Kosova është shtet i pavarur përbrenda kufijve të saj të pandryshuar.
Besoj se me kaq do të përfundonte gjithçka dhe nuk do të shkonte larg e do të pajtohej edhe vet Serbia, kur ajo do e shihte statusin e Kosovës Republikë, por statusi nuk po i thuhet Serbisë, për çka ajo po shpreson për Kosovën nën Serbi! Ky është gabimi I ndërkombëtarëve, I atyre që ndihmuan Kosovën të jetë e pavarur, nisur nga Shtetet e Bashkuara të Amerikës, NATO-n dhe BE-në e lodhur në ndërmjetësimin e bisedimeve ndërmjet Kosovës dhe Serbisë.
