Drizan Shala, ekspert i sigurisë
___
Hulumtimi i cili do të publikohet ( 14.12.2025 ) nga Kallxo, i cili dokumenton mbi 30 kalime të kamionëve, furgonëve dhe automjeteve të rënda në rrugët ilegale të kontrabandës në zonën e Junikës, mes Zubin Potokut dhe Leposaviqit, brenda vetëm gjashtë ditësh, konfirmon një model operativ që në rajon njihet si simbiotika kriminalo-shtetërore.
Ky model është i trajtuar gjerësisht në literaturën e sigurisë dhe inteligjencës dhe përdoret veçanërisht nga shtetet që synojnë të veprojnë nën radar, duke përdorur aktorë joshtetërorë për të realizuar objektiva shtetërore.
A sinjalizon kjo kontrabandë edhe futje të armëve dhe municionit në veri?Rruga e kontrabandës së mallrave të zakonshme – naftë, cigare, produkte ushqimore – është shpesh vetëm shtresa e parë e dukshme. Kur krijohet një korridor funksional, i sigurt dhe i padokumentuar nga institucionet, ai korridor përdoret edhe për mallra me interes më të lartë strategjik, përfshirë:
• Municion,
• Armë të vogla,
• Pajisje të komunikimit,
• Material logjistik për grupe të paramilitarizuara apo elemente të militarizuara lokale.
Ky rrezik rritet sidomos kur ekziston mbështetje indirekte nga strukturat shtetërore të një vendi fqinj, të cilat – sipas analizave ndërkombëtare dhe raporteve të mëhershme – i përdorin grupet kriminale si instrument operativ për të shmangur përgjegjësinë shtetërore të drejtpërdrejtë.
Pse Serbia ka interes të përdorë grupe kriminale në këtë territor?Në analizat e sigurisë rajonale, Serbia shihet se:
• I përdor grupet kriminale si mbulesë operative për të futur mjete, personel dhe logjistikë në veri;
• Në këmbim, u ofron mbrojtje, informacion dhe monitorim të hapësirës – sidomos për lëvizjet e Policisë së Kosovës dhe institucioneve të sigurisë.
Ky është një mekanizëm i provuar në disa raste, ku shteti nuk shfaqet drejtpërdrejt, por prezenca e tij projektohet përmes grupeve të kontrolluara, të infiltruar ose të varura nga strukturat e Beogradit.Korridoret ilegale si pikat më të prekshme të sigurisë së Kosovës
Pamjet e Kallxo ekspozojnë se:
• Korridoret ilegalë funksionojnë në mënyrë të rregullt,
• Automjetet lëvizin pa asnjë kontroll institucional,
• Aktiviteti është suficientisht i madh sa të përbëjë kërcënim të drejtpërdrejtë për sigurinë kombëtare.
Nëse këto rrugë shërbejnë për futjen e armëve, atëherë rreziku nuk është vetëm ekonomik — është operacional dhe strategjik, sidomos në një periudhë kur veriu është aktivizuar nga rrjete që synojnë destabilizim të kontrolluar.Pra ky hulumtimi i Kallxo nuk është vetëm një kronikë e kontrabandës — është një sinjal paralajmërues për institucionet e sigurisë se korridoret ilegale në veri janë potencialisht të përdorura për:
• Logjistikën e grupeve kriminalo-politike në veri,
• Armatim dhe municion,
• Operacione të fshehta të koordinuara me strukturat shtetërore të Serbisë.
Kjo situatë kërkon një reaksion të menjëhershëm institucional, rritje të vëzhgimit teknik, mbyllje të korridoreve dhe koordinim me partnerët ndërkombëtarë, sepse çdo kamion që kalon i pakontrolluar nuk është vetëm mall – është potencialisht kërcënim.Në këtë kontekst, video-materiali i hulumtimit duhet trajtuar si dokument operativ, jo vetëm si reportazh medial.
