Frederik Rreshpja: MITING PËR DIKTATORIN
(poezi e vitit 1982)
Ulërijnë servilët dhe injorantët- Hosana
Turma pa tru të bie ndër këmbë,
Si popull i mallkuar fisi i arbërit
I bie në gjunjë urdhërit tënd.
Asnjëri s’e sheh gjakun që rrjedh
Anës tribunës si lumë
Fantazmat e martirëve që ti vrave
Dëshpërohen mbi kokat e turmës
Por do vijë një ditë kur bronxin tënd
Turma do ta shqyejë me egërsi
Dhe do të gdhendë për mallkim
Bronxin e ndonjë diktatori të ri.
