Prishtinë – Këshilltarët e tij të jashtëm Behgjet Pacolli i ka emëruar në mënyrë të jashtëligjshme dhe po ashtu në mënyrë të jashtëligjshme ka mbuluar shpenzimet etyre të bëra jashtë vendit.
Në numër ishin më shumë sesa maksimumi që mund të emëronte, e po kështu u jepeshin shuma parash si avance ndonëse ata nuk gëzonin të drejtën për të zhvilluar aktivitete që mbulohen nga buxheti i shtetit. “KD” raporton se nga buxheti i shtetit Behgjet Pacolli ua ka hequr shpenzimet këshilltarëve të tij të jashtëm, që bazuar në një rregullore, “nuk paguhen nga buxheti … dhe në asnjë formë nuk shkaktojnë shpenzime për buxhetin e Kosovës”.
Një bashkëpunëtori i ka dhënë 4 500 euro vetëm për hotel gjatë një udhëtimi, enjërit 717 për telefon. Për një këshilltar ishin tërhequr nga ZKM-ja 3000 euro, dhe i ishin dhënë 1000 euro më pak. Për një aktivitet në Mali ishin tërhequr 10 000 euro dhe nuk ishin arsyetuar me ndonjë faturë.
Zyra e Kryeministrit, duke u mbështetur në vendime të firmosura nga Pacolli, ka mbuluar shpenzimet, pos të tjerëve, edhe të këtyre këshilltarëve të jashtëm: Mentor Nazarko, Jean Andre Ahipeaud, Amia Gbakre Noel dhe Pierre Andre Sabiton.
Pacolli firmoste vendimet për mbulim shpenzimesh në emër të kryeministrit Hashim Thaçi dhe ato i mbështeste në nenin 145.2 të Kushtetutës dhe në nenin 6.4.1 të Rregullores për fushat e përgjegjësisë administrative të Zyrës së Kryeministrit dhe ministrave. /Start/
