Prof. Dr. Sabri Tahiri, Gjilan
____
Partitë politike shqiptare, kudo që veprojnë, duket se kanë një defekt të përbashkët: e kanë kuptuar shumë mirë hapësirën ku duhet të garojnë e të luftojnë për pushtet, por ende nuk e kanë kuptuar sa duhet hapësirën ku duhet të bashkëpunojnë dhe të koordinohen për të mirën e vendit.
Në demokraci, partitë janë rivalë politikë, por nuk duhet të jenë armiq. Gara është e domosdoshme, por bashkëpunimi për çështjet madhore është përgjegjësi kombëtare dhe shtetërore. Sidomos për çështje që lidhen me funksionimin e institucioneve, interesat strategjike, sigurinë, zhvillimin ekonomik dhe perspektivën evropiane të vendit.
Për fat të keq, te ne shpesh ndodh e kundërta. Rivaliteti partiak shndërrohet në konflikt, ndërsa interesi shtetëror mbetet peng i kalkulimeve politike. Kjo tregon papjekuri politike, mungesë të kulturës demokratike dhe mosnxjerrje të mësimeve nga historia jonë e dhimbshme.
Sot, kur Kosova ka nevojë më shumë se kurrë për institucione funksionale, klasa politike duhet të reflektojë. Formimi i institucioneve nuk është çështje e një partie; është interes i Republikës së Kosovës.
Prandaj, apeli im për të gjitha partitë politike është i qartë:
Mos lejoni që Kosova të futet përsëri në ngërç politik dhe në zgjedhje të reja për shkak të paaftësisë për të gjetur kompromis.
Zgjedhjet janë themeli i demokracisë kur janë të nevojshme, por zgjedhjet e përsëritura si pasojë e papërgjegjësisë politike do të ishin një goditje e rëndë për Kosovën, për ekonominë, për qytetarët dhe veçanërisht për imazhin e saj ndërkombëtar.
Të gjithë duhet ta kuptojnë një të vërtetë të thjeshtë:
Mund të jemi rivalë në garën për pushtet, por duhet të jemi bashkë kur është në pyetje shteti.
Kosova nuk ka nevojë për më shumë inate partiake. Ka nevojë për pjekuri, dialog, kompromis dhe përgjegjësi shtetërore.
Kjo është koha për të dëshmuar se politika kosovare ka mësuar nga e kaluara dhe është e aftë të vendosë interesin e Republikës mbi interesin e ngushtë partiak.
Kosova duhet të ketë institucione. Tani. Jo pas një tjetër krize politike.
Më 4 gusht 2026
