Zeqir Bekolli , Prishtinë
Dialogu Kosovë-Serbi e polli të ashtuquajturin Asociacion i Komunave me shumicë serbe. Ky ishte njëri prej gabimeve historike, që klasa politike e Kosovës e bëri dhe po e bën në dëm të vendit tonë.
Po flitet se projekti është në kuadër të Kushtetutës së Kosovës, gjë që nuk është e vërtetë, për faktin se me këtë projekt për Asociacionin, Kosova nga pozicioni multietnik (shtet i qytetarëve), shndërrohet në shtet të dy etnive. Shtet i shqiptarëve dhe serbëve, që nënkuptohet se preket në kurriz Kushtetuta e vendit.
Serbia çdo ditë deklaron se kurrë nuk do ta njoh Kosovën, që nënkupton se e konsideron pjesë të saj, se ashtu e ka në Kushtetutën e saj. Madje, Serbia deri tash në dialogun me Kosovën nuk e ka nënshkruar asnjë marrëveshje për t’i ikur çdo obligimi ndërkombëtar.
Dyshoj shumë se me këtë rast Kosova do të rrëshqas drejt rrezikut që Kosova të bosnjizohet. Ky fakt Kosovën e shpie drejt një shteti jofunksional me probleme të përhershme. Ndër problemet e para do të jetë përpjekja e përhershme e serbëve për t’u shkëputur, siç po ndodhë me Republikën Serbe të Bosnjes, e cila në Konferencën e Deytonit u pranua si OJQ, dhe brenda tridhjetë vitesh tashmë u shndërrua në shtet, me polici e ushtri, me kërkesën e përhershme për shkëputje.
