-Ministrja e Punëve te Jashtme dhe Diasporës e Republikës së Kosovës Donika Gërvalla  në Londër në takimin e ministrave të Jashtëm të Ballkanit Perëndimor: Serbia ka nisur fushatë sistematike për destabilizimin e rajonit.

 LONDËR, 13 Dhjetor 2021/  Ministrja e Punëve te Jashtme dhe Diasporës e Republikës së Kosovës znj. Donika Gërvalla, ka marrë pjesë sot në Samitin e Ministrave të Jashtëm të Ballkanit Perëndimor që po mbahet në Londër të Britanisë së Madhe, organizuar nga sekretarja  Liz Truss dhe ministri Wendy Morton.

Shefja e diplomacisë kosovare duke falënderuar Mbretërinë e Bashkuar për përkrahjen e vazhdueshme, ka theksuar përkushtimin e Kosovës ndaj vlerave evropiane, me theks të veçantë luftën kundër krimit të organizuar dhe korrupsionit.

Gërvalla ka thënë se përkundër progresit që është bërë që nga formimi i qeverise së re, Kosova është përballur me kërcënime nga Serbia.

Shefja e diplomacisë ka vënë në pah se Serbia para pak javësh ka dërguar automjete të blinduara, trupa dhe aeroplanë luftarakë në kufirin me Kosovën.

Megjithatë kryediplomatja kosovare ka thënë se Kosova nuk është e vetmja që po kërcënohet por që ka një përshkallëzim të retorikës nga Serbia, edhe ndaj disa vendeve tjera të rajonit.

Gërvalla e ka quajtur gënjeshtër të pastër edhe qëndrimin e ministrit serb Vulin, rreth masakrës së Reçakut.

Më poshtë e gjeni të plotë fjalimin e ministres Gërvalla.

E nderuara Sekretare Truss,

Të dashur kolegë,

Të nderuar shkëlqesi dhe mysafirë,

Jam me të vërtetë e nderuar të marr pjesë në këtë takim si e ftuar e Mbretërisë së Bashkuar, e cila u bë shpëtimtare e popullit tim në çastin më të errët të historisë sonë; këtë nuk do ta harrojmë kurrë.

Jemi mbledhur këtu sot në një çast tejet vendimtar.

Vendi im, Kosova, ka bërë një kthesë të madhe pas zgjedhjeve në fillim të këtij viti, duke u bërë udhëheqëse e demokracisë dhe sundimit të ligjit në Ballkan. Që kur mori detyrën qeveria e re, Policia e Kosovës ka iniciuar gjithsej 1,401 raste që ndërlidhen me krime serioze, duke përfshirë korrupsionin dhe krimin e organizuar. Ne jemi tejet të përkushtuar ndaj vlerave evropiane dhe jemi duke e riorganizuar vendin tonë sipas mënyrës evropiane. Këtë vit kemi parë një rritje rekorde prej 10%,  si dhe rritje të deklarimeve tatimore e të të hyrave doganore. Si qeveri kemi një shkallë të jashtëzakonshme miratimi.

Kur përmendim këto zhvillime optimiste, nuk mund të mbyllim sytë ndaj realitetit në lëmenj të tjerë.

Fqinji ynë verior, Serbia, e ka kërcënuar vendin tonë me luftë para pak javësh, duke dërguar automjete të blinduara, trupa dhe bile edhe aeroplanë luftarakë në kufirin tonë, ndërsa ambasadori rus në Serbi iu bashkëngjit trupave dhe e mirëpriti këtë akt agresioni.

Kosova nuk është e vetmja që kërcënohet. Kemi të bëjmë me një përshkallëzim sistematik të retorikës, ku si shembuj të freskët mund të përmendim lëvdimin zyrtar që iu bë kriminelëve të luftës si Ratko Mladiq nga një aleat i afërt i Presidentit Vuçiq, Ministri Vulin, dhe gënjeshtrën e tij e pastër vetëm pak ditë më parë në lidhje me njërën prej masakrave më mizore në Kosovë, masakrën e Reçakut, e cila kishte nxitur një ndryshim të shpejtë në qëndrimin e Perëndimit karshi Kosovës.

E gjithë kjo nuk po ndodh rastësisht. Udhëheqësia aktuale serbe po e rrit në mënyrë sistematike propagandën dhe gjuhën e urrejtjes në kuadër të programit të qeverisë për ta sulmuar Perëndimin dhe NATO-n për ndërhyrjen humanitare dhe për ta barrikaduar Serbinë prapa një qasjeje agresive, përsëri, kundër fqinjëve të saj.

Në këtë drejtim, Qeveria e Serbisë e ka miratuar edhe zyrtarisht një strategji e cila përdor një version të riformuluar të ideologjisë së “Serbisë së Madhe” e cila çoi në katastrofë në Ballkan në vitet e 1990-ta. Në vitin 2021 një zyrtar qeveritar thërret për “Botën Serbe” dhe sërish nacionalizmi serb thotë që të gjithë serbët e rajonit duhet të jetojnë nën sundimin serb, siç tha z. Vulin në verën e këtij viti në prani të z. Vuçiq.

Nacionalistët serbë po e kërcënojnë Kosovën me luftë, po provokojnë ndarje në Bosnje dhe Hercegovinë, siç bënë edhe në vitin 1991, si dhe po përpiqen të destabilizojnë së brendshmi edhe vendet e tjera. Këto nuk janë incidente të veçuara; ato janë pjesë e një fushate sistematike për destabilizimin e rajonit, e ndërmarrë nga Rusia dhe përfaqësuesja e saj Serbia. Vetëm para disa javësh u detyruam të largonim nga vendi ynë dy diplomatë rusë për shkak se përbënin kërcënim ndaj sigurisë sonë kombëtare.

Kemi arritur në një fazë që është shumë më e rrezikshme nga sa janë të vetëdijshëm ose të gatshëm ta shohin disa, të paktën në BE. Por nevojitet veprim i shpejtë e i menjëhershëm, si dhe komunikim i qartë me ata që po e kërcënojnë paqen jo vetëm në Ukrainë, por edhe në rajonin tonë.

Po deshëm ta shpëtojmë paqen duhet të veprojmë me mençuri dhe shpejt. Mbretëria e Bashkuara padyshim që do të jetë në anën tonë në këtë betejë për stabilitetit dhe paqe. Dhe për këtë jemi vërtet mirënjohës. Nëse jemi të suksesshëm, do të vazhdojmë me atë që duhet të jetë preokupimi ynë kryesor: bashkëpunimi për të mirën e vendeve tona dhe të qytetarëve tanë.

Faleminderit shumë.

Kryeministri i Republikës së Kosovës, Albin Kurti, mori pjesë në promovimin e albumit “Përvjetori i 40-të i pranverës, 1981 – 2021”, me autorë Sylë Mujaj dhe Hydajet Hyseni.

Kur e shënojmë 40 vjetorin e pranverës ‘81, padyshim se aq sa duhet t’ia kujtojmë e përkujtojmë vetes atë vit të lavdishëm, në të njëjtën kohë kemi për detyrë që me këso botimesh sikurse ky që po promovojmë sot, t’ua bartim një trashëgimi të vlefshme edhe atyre që kanë lindur shumë më pas, por ndonëse nuk i kanë ato sfida të asaj kohe, nuk është se nuk i kanë disa rreziqe, që nuk janë aq të reja, tha Kryeministri Kurti në ceremoninë e organizuar në Shoqatën e të Burgosurve Politikë të Kosovës, në Prishtinë.

Prandaj kur rreziqet nuk mplaken, nuk do të duhej që as qëndresa, rezistenca dhe organizimi ynë të mplaket, shtoi ai.

Nëpërmjet këtij albumi, si një dritare, ai tha se shpreson që sa më shumë njerëz ta kuptojnë, se çka ka ndodhur prapa grilave të dritares së burgut.

Duke përmendur ish të burgosurit e pranishëm në ceremoni, Kryeministri tha se të gjithë ata, ndonëse ishin të burgosur në kohë të ndryshme e burgje të ndryshme, ishin për idealin e njëjtë, i cili bartet edhe më mirë te brezat e ri, atëherë kur botohet krijimtari artistike, që ndonëse ishin të ndaluara jashtë, ja që bëheshin në burg.

“Për brezat e ri sot, besoj që vlera e madhe është jo vetëm në aspektin e dijes historike dhe të vetëdijes kombëtare, por edhe në aspektin e një lloj edukimi estetik”, tha ai.

Kryeministri theksoi se beson që arsimimi duhet të jetë edhe edukim, ndërkaq edukimi nuk duhet të jetë vetëm etik, por edhe estetik. Pra, edhe edukim me vlera morale, por edhe edukim me vlera artistike.

Ai shtoi se të dyja këto kanë qenë të lidhura ngusht, si te askush tjetër, pikërisht te të burgosurit politik dhe në këtë kuptim ne nuk jemi sot të vetëdijshëm se sa shumë u kemi borxh atyre.

Nuk duhet harruar asnjëherë se Ushtria Çlirimtare e Kosovës ka pasur një plejadë të gjatë e të gjerë të të ish burgosurve politik, që i kanë paraprirë edhe mendërisht, edhe shpirtërisht, edhe fizikisht, drejt zhvillimit e ndërtimit të saj dhe drejt realizimit të çlirimit të Kosovës në qershorin e vitit 1999, tha kryeministri.

“Dhe gjakosjen jo vetëm për liri, por edhe për ushtrinë për liri, e shohim në këto vizatime të shumta, në këto poezi e në këto këngë, ku bëhet kushtrimi, bëhet thirrja për rezistencë të gjithmbarshme popullore drejt lirisë kolektive”, tha ai.

​