Ermir Gjinishi – ish nën kryetar i Komunitetit Myslyman
____
Dëmi që po shkakton Turqia në Shqipëri përmes financimeve në islam është i thellë dhe, në shumë aspekte, i parikuperueshëm.
Nëpërmjet një strategjie të qëndrueshme, po formohet një brez i ri me ndjesi të hapura antieuropiane, një brez që nesër mund të përdoret sipas interesave të Ankarasë për çdo kauzë që i shkon për shtat.
Ajo që të trondit më shumë është fakti se shumë prej atyre që frekuentojnë xhamitë e financuara nga Turqia, nuk ndjejnë më asnjë lloj simpatie për heroin kombëtar, Gjergj Kastriotin. Dhe a nuk është kjo tragjike?
Një popull i vogël si Shqipëria, që përballë kombeve të mëdha evropiane ka vetëm pak simbole me të cilat mund të krenohet, i lejon dikujt tjetër t’i denigrojë pikërisht ato!
Dikur, kur unë punoja në KMSH, njerëzit përpiqeshin të fshihnin ndikimin turk-ndoshta sepse kishin ende pak ndjenjë krenarie kombëtare. Sot, e kundërta ndodh haptazi: valvitet flamuri turk, mburren me Turqinë, dhe kushdo që mendon ndryshe etiketohen si “grekë”, “serbë” apo “të shitur”.
Ky është një mini-xhihad i financuar plotësisht nga Turqia. “Mini” për momentin, sepse ende nuk janë shumicë numerike. Por çfarë ndodh nesër, kur shqiptarët e besimeve të tjera apo laikët ndihen të kërcënuar nga ky realitet?
Përplasja është e pashmangshme. Dhe kjo është arsyeja pse ndikimin turk në çdo sferë të shoqërisë shqiptare e konsideroj rrezik serioz, aq më tepër tani që Shqipëria synon të bëhet pjesë e Bashkimit Evropian.
