Si atdheu duhet pa kushte, siç e deshti Hysen Gega !

Nga: Shemsije Elshani

Në vend të lamtumirës…

Ne, shokët e klasës dhe të krejt gjeneratës që ishim të organizuar në veprimtari patriotike jemi rritur e frymëzuar me emrin e Hysen Gegës. Unë nuk e kam takuar shpesh, por, sa herë rastiste të ndodheshe në shoqëri me të, ndjeje një siguri të madhe, ndjeje sikur bëheshe me krahë.

Hysen Gega ishte ndër ata patriotë, të cilit dashuria për atdheun, për Shqipërinë, dashuria për njerëzit, për shokët, miqtë e të afërmit, i lexohej në sy.

Më ka ngelur në kujtesë një bisedë me avokatin H.Susuri që mbronte Ukshin Hotin në gjykimin e tij.

Në vitin 1994, pas përfundimit të seancës së gjykimit të Ukshin Hotit, ktheva njëherë në zyren e tij. Më duheshin ca të dhëna për librin e Ukshin Hotit, të cilin po e përgadiste vëllai im Bislimi, që asokohe ishte në Zvicër. Në bisedë e sipër derisa po flisnim për emancipimin politik tonin, për të cilin shkruante Ukshin Hoti, unë shtoj që te ne nuk është bërë as emancipimi shoqëror, pa le më ai politik.

– Suhareka është vatër e fortë e emancipimit thotë ai.

– Po… them unë, dhe fillova t’i përmend disa faktorë që mund të kenë ndikuar.

– Ballkani, fabrika ” Ballkan” ka ndiku në emancipimin e tërë komunës, më thotë.

– Edhe Radiotelevizioni Shqiptar them unë.

Dhe po i tregoj si ka ndikuar te unë, te shokët dhe shoqet e mia ata filma të Kinostudios “Shqipëria e re”, si kanë ndikuar festivali i Gjirokastrës dhe ai i “Këngëve të lehta”.

Pastaj i përmenda shokët dhe shoqet e mia Fadilin, Muratin, Shpresën, Dritën, Bekimin, Dashurijen, Fadileten, Halilin, Naserin e tj.

– Hysen Gegën, vazhdoi ai.

– Po, dhe ai, i them unë.- E kemi pasur frymëzim ne të gjithë Hysen Gegën, veç nuk ka qenë me ne n’shkollë.

– Jo… tha ai….-Hysen Gega nuk bëri shkollë, por ku ka shkollë, ku ka diplomë fakulteti që i bjen tamam gjithë atij përkushtimi për atdhe?!

Herën e fundit Hysen Gegën e takova në një përvjetor të Afrim Zhitisë.

Ia lexova mallin në sy. Një shok bile më tha:

– Sa ëmbël të shikon Hysen Gega.

– Po… i them. -Hysen Gega na sheh të gjithëve me sytë e zemrës, aty ku fillon dashuria për atdheun. Ne për te jemi pjesë e kësaj dashurie.

Prehu i qetë në tokën të cilën e deshe aq fort dhe për të cilën bëre kaq shumë i dashur Hysen Gega! Je shembulli më i mirë se si atdheu duhet pa kushte, si si për të qenë patriot mjafton të jesh NJERI I MIRË!

Si atdheu duhet pa kushte, siç e deshti Hysen Gega !

Shkrime relevante

K O M E N T E

SHKRUAJ NJË KOMENT Anulo përgjigjjen